Theo Walcott-a'n Everton a pan

Arsenal forward Theo Walcott chuan hmun nghet a chan theihna tura ngaih Everton a pan ta. England international lalut turin Toffees hian pound maktaduai 20 chuang an seng tiin khawthlang media te chuan an tarlang a, he thu buatsaih lai hian a man zat chiang taka tarlan a la ni lo.

Kum 28 mi Walcott hian Arsenal tan inelna hrang hrangah match 397 khelah aṭangin goal 108 khung mah se tun hnaiah Emirates Stadium-ah hmun a chang mumal tawh lo a, Premier League club ṭhenkhatin lakluh an duh. Everton bakah hian a club hlui Southampton chu amah duhtu langsar zingah an tel.

Tun season-a league match ruk chiah la khel Walcott hian nimin khan Everton-ah medical a paltlang, he thu i chhiar lai hi chuan mimal inremna pawh an ziakfel tawh tura ngaih a ni. Merseyside club manager Sam Allardyce kaihhruaina hnuaiah hmun nghet chan tumin chona thar a hmachhawn dawn.

Allardyce chuan Walcott hi tlarhma lama player ṭha leh hlauh­awm a nih thu a sawi tawh a, "A rawn lut a nih chuan min belhchhah­tu ṭha tak a ni ang," tiin a sawi tawh bawk. Walcott tan FIFA World Cup khelh beiseina siam turin club tana inkhelh tamna kawng a inhawng dawn a ngaih a ni.

Southampton Academy aṭanga inzir chhuak Walcott hian Saints aṭangin a football nun bul a ṭan a, a tlan chak bakah ball cross a thiam avangin striker ni mah se Wenger-a'n a sirah a khelhtir ṭhin.

Khelmual sir aṭang pawhin player hlauhawm a nihna a nep chuang lo. Premier League bikah goal 65 a khung bakah ṭhiante khung tur vawi 43 a siamsak bawk. Gunners tana goal khung kawnga inrawlh tam lamah hranghlui Thierry Henry (249), Dennis Bergkamp (181), Robin Van Persie (135) leh Ian Wright0 (123) te chiah tluk loh a nei.

Merseyside club hian nipui laiin fapa tlanbo Wayne Rooney an kokir tawh a, tun thlasik chhungin Besiktas aṭangin striker Cenk Tosun chu pound maktaduai 27-in an lalut fel tawh bawk. Midfielder Ross Barkley erawh Premier League champion Chelsea lakah an chan thung.