Mourinho-a'n contract pawtsei dawn

Manchester United chuan an ma­nager Jose Mourinho nen contract thar chungchangah inremna an nei hnai.

Portuguese manager hian Old Trafford-ah kum 2019 thleng daih con­tract a nei a, inremna an neih theih chuan kum 2021 thleng cham tura ngaih a ni.

Mourinho hi chhuak tura sawi thawm a awm hman a, an sawi dan chuan Portuguese manager hi transfer-a a sum hman tur a neih zatah a lungawi lo a, hei bakah hian Manchester-a inbengbel loin chenna atana hotel a hman avangin United-ah hian nghet lo niin an ngaihruat bawk.

Amaherawhchu, United manager hian chhuak tur anga an sawi thuthang hi a dik lo tih a sawi a, hemi hnu hian club lam pawhin sum thehchhuah kawngah an pawk sawt nia ngaih a ni. An hmelma Manchester City el pha turin Arsenal aṭangin Alexis Sanchez lakluh an tumna kawngah pawh Chilean forward hi sum an tawktarh hnem hle.

Mourinho hian May 2016 khan United hi a zawm a, season khatnaah EFL Cup leh Europa League-ah a cham­pion nghal. Sir Alex Ferguson leh Sir Matt Busby te chuan United hi kum 27 leh kum 24 an enkawl a, Ferguson-a hma chiaha mi Ron Atkinson khan kum nga leh thla nga chhung enkawl hmanin Sir Alex-a chhuah hnuah erawh United-in kum thum daih pha manager an nei lo.