Hammers leh Foxes an tlang

West Ham leh Leicester City te chuan FA Cup third round replay an paltlang. Premier League club pahnih bakah hian Championship club Sheffield Wednesday, Reading leh Cardiff City te pawhin fourth round an lut ve bawk.

Premier League hmahruaitu Manchester City hmachhawn tur a chiang tawh. Cardiff City chuan Mansfield Town lakah 4-1 a hnehna changin fourth round an lut a, Championship club hian Pep Guardiola enkawl Man City an hmachhawn dawn.

A goal tlai
Thawhlehni zan inkhelah West Ham-in League 1 club Shrewsbury Town chu si khat faiin an hneh hram. West Ham hian tun hnaia khel ṭha tak forward Marko Arnautovic leh Mark Noble te bench-ah an ṭhut chawlhtir a, goal an neih theih mai loh avangin inkhelh hmabak minute 20 an la neih laiin luhtir an ni.

Hammers tan Noble-a'n a tauh lut ngei dawna a lan hnuah midfielder Ben Godfrey-a'n a pet chhuah sak hman a, hun tawp dawnah Arnautovic thawhrah sengin Manuel Lanzini-a goal khung tur pawh substitute James Bolton chuan goal line aṭangin a petchhuahsak hman hram.

West Hman hian club tenau zawk nia ngaih lakah hnehna chang turin an nghah rei a ngai hle, minute 90 chhunga goal a luh loh vangin extra time khelh a ngai hial a ni.

Mahse, khel ṭha zawk West Hman dan reng theih an ni lo. Corner an hmuh aṭanga ball kal zel chu Antonio Martinez-a'n Burke tan pein, Hammers tana match 14 a khelhnaah kum 21 mi Burke hian chiang zetin chakna goal a khung.

West Ham manager David Moyes chuan, "Kan lakah beiseina a sang a, chutih rualin cup inelna a nih chuan a awlsam ngai lo," a ti. London club hian Janaury 27 khian Wigan leh Bournemouth te inkhela chak zawk an hmachhawn leh ang.

Foxes tan VAR
Kelechi Iheanacho chuan English football chanchin ziak danglamin, Leicester City striker hi video assistant referee (VAR) vanga goal khung thei hmasa ber a ni. Iheanacho hian League 1 club Fleetwood lakah a club hi si khat faiin hnehna a chanpui.

Manchester City striker hlui Iheanacho hian Islam Slimani hnen aṭanga a ball hmuh chu minute 43-naah an goal hmahruai ni turin a khung. Goal hnihna a khung danah erawh VAR hman a ngai. Riyad Mahrez-a'n through ball a pek laiin Foxes player Iheanacho hi offside nia ngaih niin a goal khung chu pawm a ni lo.

Amaherawhchu, referee Jonathan Moss chuan video official Mike Jones a be rawn a, Jones hian Iheanacho leh Fleetwood defender Nathan Pond-a ke awmna chu a inrual tih hrilhin, goal a luh aṭanga second 67 a liam hnuah goal atan pawm chian a ni chiah.

Nigeria striker Iheanacho hian nikum nipui lai khan Manchester City aṭangin pound maktaduai 25-in Leicester hi a zawm a, beisei angin a khel chhuak nghal mai lo - minute 403 chiah a la khelh sak.

October thla khan Leeds lakah goal khat a khung bak chanchinṭha sawi tur a la ngah lo. Mahse, Fleetwood lakah erawh a theihna sanzia a lantir, goal hnih a khung bakah Foxes player manto Slimani nen an inkawp rem a, Slimani tan hun ṭha vawi hnih siamsak thei mah se Algerian international hian goal atan a chantir thei lo thung.