Balotelli leh Falcao ten goal khung

Thawhlehni zan French Ligue 1 inkhelah AS Monaco leh an mikhual Nice te chu 2-2 in an inhnehtawk. Club pahnih tan hian Radamel Falcao leh Mario Balotelli ten goal an khung.

Champion lai Monaco lamin Adama Diakhaby hmangin goal hmahruai khung mahse Nice hian Liverpool leh Manchester City striker hlui Mario Balotelli-a goal hnih hmangin an chhang let a, hun tawp dawnah Falcoa chuan an si phurh a sut zo hram.

Inkhel dangah Marseille chuan Clinton N'Jie leh Dimitri Payet te goal hmanga Strasbourg 2-0 a hnehin point 44 an hmu a, Monaco nen khelh zat inangah point khata an san zawk avangin pahnihna an ni. League hmahruaitu Paris St-Germain chuan ni zan khan Dijon an hmachhawn thung a, he thu buatsaih lai hian result kan hre hman lo.

Tun season Ligue 1 kal laiah striker hmuhnawm an awm nual, Colombia international Falcao hian goal 16 a khung tawh a, PSG hmatawng Edinson Cavani aiin goal thumin a khung tlem bawk - Italy international Balotelli pawhin inelna hrang hrangah goal 18 a khung tawh bawk.