Mumbai City khelmualah Bengaluru

Zanin dar 8:00-ah Indian Super League inkhel pakhat a awm dawn a, Mumbai City chuan Bengaluru an mikhual ang. Team pahnih hi season ṭantirah an lo inhmachhawn tawh a, Bangalore club-in an mual hmanthiamah 2-0 in hnehna an chang–Mumbai City-in phuba lak an tum ang.

Mumbai City-ah Mizo tlangval Lalchhawnkima a awm a, Bengaluru-in Lalthuammawia Ralte, Malsawmzuala leh Zohmingliana Ralte kawl mah se Spanish coach Albert Roca enkawlna hnuaiah Mizo tlangval ten hmun an chang meuh lo.

Match hnuhnung pahnihah Mumbai City-in hnehna an chang zo lo a, a zawna match thum chak loh an duh lo ang. Bengaluru an bang bik lo, South Indian club hian rin loh takin an match hnuhnung berah 2-0 in Delhi Dynamos an ngam lo a, zanin hi an tan thawhlehna hun ṭha a ni.

Bengaluru tan tlarhmaah Venezuela international Miku, India captain Sunil Chhetri leh Real Zaragoza winger hlui Edu Garcia te chu innghahna an ni leh dawn a, Mumbai tan Flamengo aṭanga loan-a an hawh Thiago Santos, Cameroon tana vawi 42 inlan thei attacking midfielder Achille Emana leh Paris Saint Germain winger hlui Everton Santos te chu innghahna an ni thung ang.