McLaren inhnukdawk

Pathianni hian tun season atana Formula 1 intlansiak hmasa ber Australian Grand Prix tlan a ni dawn a, nimin khan team inlan tur zinga mi McLaren chu an member zinga miin coronavirus a vei tih hmuh chhuah a nih avangin an inhnukdawk.

Ruahman dan chuan Australian Grand Prix-ah hian a hmunah entu an awm thei dawn a, tluang taka neih tlang theih beisei mah se hun tepter tawh takah harsatna a rawn lang chhuak. McLaren chuan thuchhuah siamin, "McLaren team chu 2020 Formula 1 Australian Grand Prix aṭangin kan inhnukdawk, team member zinga miin hri a kai tih hmuh chhuah a ni a, uluk taka enkawl nghal a ni," an ti. Haas team member zinga mi pali pawh endik an ni, mahse American team hian an member-te hian hri an kai loh thu an sawi.

Driver champion lai Lewis Hamilton chuan inelna pangngai an nei tur chu mak a tih zawk hial thu a sawi tawh. Britain tlangval chuan, "Khawvel pumin hri leng a buaipui a, F1 fans zingah pawh a kai leh kai lo an awm ngei dawn tih chu a chiang. America an inkharkhip tawh a, NBA an chawl rih bawk. Hetiang boruak kara keini lamin inelna kan nei tur hi a mak," tiin a sawi.