FA Cup : Blues-in Norwich an hneh hram

FA Cup third round replay-ah Chelsea chuan 1-1 a Norwich an inhnehtawkpui hnuah penalty hmangin 5-3 in hnehna an chang hram–team pahnih hi intawn hmasakah goal khung loin an inhnehtawk tawh a, replay khelh a ngaih phah.

Blues keeper Willy Caballero chuan Norwich penalty hmasa ber chu a dang nghal a, inkhel pangngaia post pet pertu striker Nelson Oliveira chu a vanduainain penalty thlengin a zui.

Inkhelh tawpa sawi zui hlawh ber erawh video assistant referee (VAR) buaina a ni. Chelsea tan Willian-a'n penalty a hlawh chhuak ngei nia a inngaih laiin referee Graham Scott chuan yellow card a pe a, hei hi VAR hmanga ennawn theih ni reng mah se video official Mike Jones chuan referee thutluknaah tihsual a awm loin a ngai a, ennawn a ni lo.

Inkhel chu
Stamford Bridge-ah Chelsea-in awlsam taka hnehna chang tura beisei an nih laiin Norwich khelmuala an intawn hmasak ang thoin a awlsam lo. Minute 55-naah an goal hmasa ber an khung ve chauh a, Michy Batshuayi chuan minute 55-naah goal hmahruai a khung–match 11 hnua a goal khung leh hmasak ber a ni.

Norwich-in huaisen takin an bei chhunzawm a, Blues khelmualah tlawm an duh lo. Hun pek belh minute 94-naah Canaries-in an huaisen rah an seng ta nge nge–Timm Klose siamsak chu Jamal Lewis chuan a career-a a goal khung hmasak ber ni turin a tauh lut a, Blues-in minute 30 dang an khelh belh a ngaih phah.

Extra time
Stamford Bridge-ah minute 90 chhungin buaina a awm lo a, dive vangin Pedro chu yellow card pek ni mah se referee thutluknaah sawisel tur a awm lo. Mahse, hun pek belh a ni a, Klose sliding tackle avangin Willian a tlu a, Brazilian winger tan tluk loh theih ni mah se a tlu a, Klose kein a tawh fuh miau avangin penalty tur a ni. Mahse, referee-in yellow card a phawrh a, VAR hman theih reng ni mah se an hmang lo.

Alvaro Morata-a'n penalty hlawh-chhuah a tum luatah vawi hnih a tlu bawk a, a vawi hnihnaah yellow card pek a ni–Spanish striker hi yellow card pek a nih ṭum hian mawi lo takin a che zui a, red card pek zui a ni. Morata hian hnai set sawt aṭangin tauh luhna hun remchang a nei a, mah se a chhawr lo. Morata bakah Pedro chu yellow card pahnih hmuh vangin hnawhchhuah a ni bawk a, player pakua nichungin Blues-in inkhel an khar.

Lungawi lo Conte
Chelsea-in harsa takin penalty hmangin hnehna an chang hram a, VAR hmanna turah hman a ni lo a, Blues manager Antonio Conte a lungawi thei lo. Italian manager chuan, "Replay in en chuan Willian tlukna kha chiang takin penalty a ni tih in hmu thei ang," a ti a, a lungawi lo hle. Khelmual chhungah referee-in thutlukna an siam sual chuan video referee-in a thutlukna chu a dik loh thu leh replay hmanga ennawn theih a nih thu a hrilh thei a, mah se video referee Mike Jones berin ṭul a ti tlat lo.

Conte chuan sawi chhunzawmin, "Morata tlukna kha chu penalty a ni lo a ni mai thei a, mah se Willian kha chu a ni chiang a ni. VAR hi ṭha taka hman kan tum tak tak a nih chuan zanin ang kha chu tihsual chi a ni lo a, khatiang thutlukna chiang lo takah chuan hman ngei ngei tur a ni. Tuna thutlukna hi chu khelmual chhunga referee tih dik loh a ni lo a, pawn lama video inchhawp a, engkim hmu chunga referee rawn lo tu kha tisualtu chu a ni," tiin video referee chungah a lungawi lo hle.