Djokovic-a'n Monfils a ngam

Kaw lum tak hnuaiah Australian Open khelh chhunzawm zel a ni a, nimin khan vawi ruk champion tawh Novak Djokovic chuan Gael Monfils lakah set hmasa ber hloh zet mah se 4-6, 6-3, 6-1, 6-3 in hnehna a chang.

Rod Laver Arena-a khaw lum zawng chu 39C a ni a, French tlangval Monfils chu set hnihnaah a luna vangin a buai, court a chhuahsan rualin doctor ten an enkawl zui nghal. Australia khawpui Melbourne-ah hian nipui lai chuan khaw lum zawng hi 40C te a ni ṭhin.

Grand Slam vawi 12 champion tawh Djokovic chuan, "A bik takin a tir lam darkar khat chhung kha chu a harsa em em, court chhungah khan kan pahnih khan khaw lum kan tuar dun a ni," a ti.

Serbian tlangval hian a kiu hliam chu 100%-in la dam lo mah se hma a sawn zel thu a sawi bawk, Inrinni khian seeded 21-na Albert Ramos-Vinolas nen third round an khel leh ang.

Inkhel dangah kum 36 mi Julien Benneteau chuan seeded pasarihna David Goffin chu 7-6 (7-5), 6-1, 7-6 (7-4) in a hneh a, seeded pangana Dominic Thiem-a'n set hnih a hloh hmasak hnuah American tlangval Denis Kudla a hneh let bawk.

Mipa singles player beiseiawm dang zingah Juan Martin del Potro, Adrian Mannarino, Tomas Berdych leh Marton Fucsovics te pawhin an khingpui ṭheuh hnehin second round an paltlang.