Jerry Mawia hming a mawi

Nilaini zan khan Indian Super League chanchin ziah danglamin a awm a, a thlen tirtu chu Mizo tlangval Jerry Mawihmingthanga a ni–Chanmari tlangval hian ISL-a goal lut rang ber a khung.

JRD Tata Sports Complex-ah Nilaini zan khan Jamshedpur chuan Kerala Blasters an mikhual a, inkhel entu mipui au tir turin JFC lamin an nghah rei a ngai lo–inkhel ṭanna hamrik rik rual deuhthawin Ashim Biswas chuan goal-ah shot a nei a, a per lehlam hi Jerry Mawihmingthanga ke bulah tak a tla.

Mizoram Premier League U 17 best player hmasa ber hian goalkeeper Paul Rachubka a bum hnuah harsatna nei loin goal-ah a chantir a, goal luh hun hi second 23 a ni – Emerging Player of the Match atan thlan zui a ni bawk.

Jamshedpur tan hian Ashim Biswas chuan ISL-a a goal hmasa ber a khung ve bawk a, hun pek belha Mark Sifneos goal khung chu mualpho khuhna chauh a ni tawh. Blasters tan hian ṭum dang ang bawkin Lalruatthara chuan inkhel bul a ṭan.

Zaninah ISL inkhel pakhat a awm dawn a, Robert Lalthlamuana, Lalrindika Ralte leh Lalrempuia Fanai te khelhna NorthEast United chuan Jeje Lalpekhlua leh Jerry Lalrinzuala khelhna Chennaiyin FC an mikhual ang.