Mizoram basketball team an chak

India rama basketball inelan sang leh nghaihhlut ber 68th Senior National Basketball Championship khelh mekah nimin zing khan Mizoram team chuan an match hmasa ber an khel a, rahbi thar rap turin Arunachal Pradesh chu 56-28 in an sawp. Mizoram team hian a vawi khat nan National Senior match-ah hnehna an chang ta chiah a ni.

Mizoram aiawh tur hian MBBA chuan MSL champion Mission Veng Vikings a tir a, Jawaharlal Nehru Indoor Stadium, Periyamedu, Chennai-ah captain Moses Zoremmawia chuan point 12 a score bakah K. Lalrinchana'n point kua a nei bawk–Mizoram team player an khel ṭha rual a, an chakna hnar chu thawhhona ṭha a ni.

Ram pum huap inelna lianah Mizoram hi Arunachal Pradesh, Tripura, Jharkhand leh Chandigarh te nen group khatah an awm. Vawiin tlai dar 3:30 hian an group match hnihna atan Jharkhand an hmachhawn leh nghal dawn a ni.

Mizoram coach H. Lalhruaitluanga chuan, "Kan group-a team panga hi kan intluk tawk hle turah ka ngai. Kan match hmasa berah pawh kan khingpui ten min nawr na hle a, a tir lamah chuan hma pawh an hruai. Mahse, a tawpah erawh fitness nei ṭha zawk kan dingchangah ka ngai," tiin Vanglaini a hrilh.

Manager a nih laia Vikings tana MSL nomawi chawi tawhtu Hruaia chuan sawi zawmin, "Kan zinkawng a thui a, kan naute an chau hle. Chu bakah tawnhriat kan la nei tam tawk lo a, match lehpekah chuan tun aia ṭha zawkin kan khelh theih ka beisei," a ti a, chona hautak an hmachhawn dawn thu a sawi bawk.