Kum 75 miin goal khung

Egyptian footballer Ezzeldin Bahader chuan professional footballer awm tawh zinga upa ber ni turin kawng dik a zawh zel a, kum 75 mi nichunga match a khelh hmasak berah goal a khung nghal!

Bahader hian professional footballer upa ber ni turin match hnih tluan khelh a mamawh a, Egyptian third division club October 6 tan hliam nei chungin minute 90 tluan a khel. Fa pali leh tu paruk neitu Bahader hian a club tana goal awmchhun chu penalty aṭangin a khung a, an elpui Genius nen 1-1 in an inhnehtawk a ni. 

Bahader chuan, "Official game-a professional footballer goal khung thei upa ber record ka siam a ni," a ti a, March 21-a match an neih leh turah a inlan thei a nih chuan Guinness World Records book-ah professional footballer upa ber angin a hming a chuang ang. 

Tun dinhmuna professional footballer upa ber record chelhtu chu Isaak Hayik a ni a, Israeli goalkeeper hian nikum khan an ram division hniam lam club Ironi Or Yehuda tan si ban nghakin record a siam - kum 73 leh ni 95 mi a ni. 

Professional football khel ngai lo Bahader hian record siam duh hian club hrang hrangah lehkha a thawn a, October 6 hian Guinness World Records-a club hming chuantir duhin an lo lalut a ni.