Aizawl FC tan a la champion theih em?

I League champion lai Aizawl FC-in tun season-ah hneh loh pahnih tawng tawhin match riat khelhah point 14 an hmu a, hmahruaitu Minerva Punjab chu point riat zetin an phak lo.

Mizo club hi chhiarkawp dan chuan an la champion thei a, an dinhmun tak hre tur erawh chuan zirchian a ṭul thung.

Fixture mumal lo
I League fixture an duan danah fuh tawk lo a tam hle. Langsar tak pakhat chu team khelh zat a inang lo. Aizawl FC-in match riat chauh an la khelh laiin Indian Arrows chuan vawi 11 an khel tawh thung.

Mizo club hian Minerva Punjab an hneh hnuah an khelh zat a tlem avangin ngaih ṭha takin an awm a, amaherawhchu Mohun Bagan an hneh loh bakah East Bengal an draw avangin tun Inrinnia an hmachhawn tur Neroca hi hneh pawh ni se hmahruaitu Minerva hi khelh zat inangah point ngain an pha dawn lo tihna a ni.

Aizawl FC hian team ṭha East Bengal vawi hnih an khelhpui tawh a, Neroca leh Indian Arrows te an la hmachhawn lo. Hmahruaitu Minerva erawhin foreigner nei lo Indian Arrows lakah point ruk an hlawh chhuak a, Mizo club hian Punjab club hnung an zui theih chuan champion kawng zau zawkin an inhawng thei ang.

Hmabak khualmual
Aizawl FC-in tun season-a an match riat zinga match nga chu an mual Rajiv Gandhi Stadium-ah an khel a, an hmabak inkhel hi khualmual a nih dawn avangin point hmuh a harsa dawn.

February thla hi Aizawl FC hmalam hun hril tur chu a ni. Mizo club hian thla tharah match sarih ngawt an nei a, chung zinga match khat chauh chu an mualah an khel dawn.

AFC hian Combaitore-ah Chennai City (Feb 3) an khelhpui ang a, hemi zawh hian Churchill Brothers (Feb 6), Neroca (Feb 10), Indian Arrows (Feb 16) leh Shillong Lajong (Feb 19) te chu khualmualah an hmachhawn ang.

February 23-ah Indian Arrows an mikhual leh a, February thla khar nan hmahruai mektu Minerva Punjab (Feb 26) hmachhawn turin an zin chhuak leh dawn. Aizawl FC tan champion nawn tur chuan ṭha taka February thla hi an paltlang a ṭul dawn a ni.

Champions League
Aizawl FC hi I League champion lai an nih avangin Asia rama club inelna sang ber AFC Champions League Playoff an khel dawn a, Mizo club hian January 30 hian Foolad Shahr Stadium-ah Iran Pro League club Zob Ahan Esfahan FC an hmachhawn dawn.

Mizo club tan AFC Champions League khelh thei dinhmuna din hi chanchin chhinthlak tak ni mah se I League nomawi humhim kawngah erawh a pui lo ang. AFC hi an zinchhuah dawn avangin an fixture neih sa a hautak sawt ang.

Neroca a pawimawh
Aizawl FC tan erawh thui tak thlir ṭhat rualin tun Inrinnia Neroca an hneh chuan an hmalam a êng dawn a, Mizo club leh Mizo mipui tan NorthEast derby ngaih pawimawh hi a ṭul a ni.

I League kai thar Neroca hian point 18 an hmu tawh a, AFC aiin match khatin an khel tam zawk. Mizo club hian Manipur club hi an hneh thei a nih chuan khelh zat inangah an lehpel thei dawn tihna a ni a, derby match a nih bawk avangin inkhel pawimawh bik a ni.

Mizo club hian January 25 hian Mohun Bagan an mikhual chhunzawm dawn bawk a, an hmabak match hnihah hian champion inbeisei team pahnih an hmachhawn dawn a, inkhel hmuhnawm thlir tur a awm ang.