Mizo TT khel thiam feh chhuak

Table Tennis Federation of India hnuaia inelna lian leh ngaihhlut ber pakhat 11Sports 79th Junior and Youth National & Inter State Table Tennis Championship khel turin Mizoram Table Tennis Association chuan youth team a tir chhuak.

Season kal lai kharna tur inelna lian hi Sidhu Kanu Indoor Stadium City Centre, Durgapur, West Bengal-ah vawiin aṭangin khelh ṭan a ni dawn a, Mizoram aiawhin Lalhunhlua, Lalruatsanga leh Roluahpuia te an inlan ang. Mizoram team hian inelna hmachhawn tur hian theihtawp an chhuah a, nikum December 28 aṭang khan Non Residential Coaching Camp buatsaih a ni.

January 25-30 chhung hian 11Sports 79th Senior National & Inter State Table Tennis Championship khelh chhunzawm a ni dawn a, MTTA chuan inelna hmachhawn turin Lalhunhlua, Lalruatsanga leh Lalmalsawma te bakah hmeichhe player Lalmuanawmi, Lalneihkimi leh Vanlalfeli te a tir dawn. Mizoram senior team hian January 23 hian Aizawl an chhuahsan ang.

India ram pum huap TT inelna lianah hian Mizoram aiawha kal team bakah hian Mizo player dang hmuh tur an awm dawn. India sub junior number 1 Jeho Himnakulhpuingheta leh Alberto LR Ruata te chu an inzir mekna Petroleum Sports Promotion Board (PSPB) hmingin an khel thung dawn a ni.