Wimbledon champion a tla

Australian Open khelh mekah Wimbledon champion lai Garbine Muguruza chu second round paltlang zo loin vuak tlak a ni. Maria Sharapova erawh che ṭha chhunzawmin third round a lut thung.

Ningani inkhelah seeded pathumna Muguruza hi world number 88 Hsieh Su-Wei lakah 7-6 (7-1), 6-4 in a chak lo. Spain nula Muguruza hian beisei a phak lo, set pahnihah hian 5-2 ve vein a hnufual a, set hmasa zawkah tie break khelh pui thei mah se a hnuhnung zawkah erawh chu tho chhuak tur a awm lo.

WTA Tour singles title pakhat la ve tawhtu Hsieh hian tun hmain Melbourne Park-ah sulhnu ṭha a la nei meuh lo, kum 2008 khan last 16 lut ve mah se world number 1 ni ṭhin Justine Henin a ngam lo. Third round-ah Hsieh hian seeded 26-na Agnieszka Radwanska a hmachhawn ang.

Maria a tlo
Rod Laver Arena-a inkhel dangah Grand Slam vawi nga champion tawh Maria Sharapova chuan seeded 14-na Anastasija Sevastova chu darkar khat leh minute 20 chhungin 6-1, 7-6 (7-4) in a hneh.

Kum 30 mi Sharapova chuan, "Set ka lak dawnah ka service min chhuhsak a, mah se ka chiai duh loh avangin ka tlang ta tho. Round sang zawk ka lut thei hi ka tan chuan a hlu hle," tiin a sawi.

Russian nula Sharapova hian Inrinni hian 2016 Australian Open champion Angelique Kerber a hmachhawn dawn a, German nula Kerber hian a kum 30 tlin champha a lawm niah Donna Vekic chu 6-4, 6-1 in a hneh a ni.

Kumin Australian Open khelh laiah hian, hmeichhe singles player la dam zingah Sharapova leh Kerber te chiah hi he hmuna nomawi chawi tawh an ni–an inkhel tur hi a hmuhnawm ang.

World number 1 hlui Kerber hian 2016 khan Serena Williams hnehin Melboure-ah hian nomawi a chawi a, German nula zingah Steffi Graf (1999) hnua Grand Slam champion ni leh thei hmasa ber a ni–hemi season hian US Open title a la bawk.

Mahse, season hmasa khan beisei a phak lo a, tun inelnaah pawh hian seeded 21-na a ni phak hram. Inelna takah erawh a khel ṭha thei hle, a khingpui tur Sharapova pawh thla 15 hrem tawk tawh a ni a, a ropuina ṭhin neih let tuma thapui thawh mek a ni.

Inkhel dang
Britain nula Johanna Konta pawh world number 123 Bernarda Pera hmaah 6-4, 7-5 in a chak lo. Seeded pariatna Konta hian tun hnai season hnih chhungin Australian Open hi semifinal leh quarterfinal a khel a, player hlauhawm berte zinga mi a ni. Mahse, kuminah erawh beisei a phak lo hle.

Kum 26 mi Konta chuan, "Inelna ka hmachhawn zawng zawngah hian nomawi chawi tumin ka inlan vek ṭhin a, tun ṭuma hma taka ka chak lo nghal hi pawi ka tiin ka lungngai hle. Mahse ka chak lohna aṭang hian zirchhuah ka neih ngei ka beisei," tiin a sawi.

Seeded parukna Karolina Pliskova pawhin minute 44 chhung lekin Brazil nula Beatriz Haddad Maia chu 6-1, 6-1 in a sawp ve bawk. Pliskova hian Lucie Safarova a hmachhawn leh ang.