Messi penalty hlah zanah Barca an tlawm
Catalan Derby-ah Lionel Messi-a'n penalty pet mah se goal-ah a chantir thei lo a, Barcelona chuan an mikhualna ramah Espanyol chu 1-0 in an ngam lo–club pahnih inhmachhawnna inkhel hi Copa del Rey quarterfinal first leg a ni a, Nou Camp-a la inkhel leh tur an nih avangin Barca hi thaibo ngawt theih an la ni lo.
Nilaini zan inkhelah Atletico Madrid-in chak result an hlawh chhuak zo bik lo a, an mikhual Sevilla lakah 2-1 in an tlawm. La Liga table-a top three dinhmun luah mek zingah Valencia chu chak awmmchun an ni a, an mikhual Alaves chu 2-1 in an hneh hram.
Messi a tlawm
Espanyol khelmualah Barcelona coach Ernesto Valverde-a'n an ṭhat dan berin player a rem lo a, Luis Suarez chu bench-ah dah ni mah se Lionel Messi erawh inkhel bul ṭantir a ni thung–goal khung loa chawlhlawk hman a nih hnuah Suarez hi minute 59-naah tlan luhtir leh erawh a ni tho a, Uruguayan striker hian goal erawh a keng tel lo.
Minute 62-naah Sergi Roberto chu penalty area-ah tih tluk a ni a, Barca-in penalty an hlawh chhuak. Barca tan thiampuipa Lionel Messi a lo pen chhuak a, goalkeeper Diego Lopez chuan ṭhat zetin a lo dan sak–hun tawp nan minute hnih chiah a awm tawh tihah Espanyol-in Oscar Melendo hmangin goal an khung zui a, rin loh zawk an chak. Barcelona-in August 2017 hnua tlawm hmel an hmuh hmasak ber a ni.
Valverde thukhawchang
Barcelona boss Ernesto Valverde chuan, "Goal hmaah kan vanduai a, penalty kan chhuih luh loh khan Espanyol fan-te kha a ti phur em em bawk. Kha khan player-ah phurna a pe tel a, goal an rawn khung ta mai a ni. Match danga kan tih ṭhin dan ang thoin goal khung ngei kha kan duh a, mah se an tlarhnung a phui em avangin kan thei lo a ni," tiin an khingpui team a fak.
Valverde chuan semifinal an la luh theih thu sawi nghalin, "Semifinal lut tura rinawm zawk chu a chak zawk team an ni mai. Mahse, last 16-a first leg-ah pawh khan Celta Vigo kha kan lo hneh lo tawh," tiin an comeback thu a sawi a, Valverde chuan, "Result duhawm a ni lo. Mahse, kan khelmualah kan khel dawn a, cup competition a nih miau avangin a tawp thlengin kan bei ang," tiin a sawi.
Atletico chak lo
Barcelona tlawm zanah Atletico Madrid tan Diego Costa chuan goal khung mah se Chelsea striker hlui goal hian Atletico a chhan zo lo–Atletico goalkeeper Miguel Angel Moya ball dan per chuan Lucas Hernandez perin an lamah an ti lut a, Joaquin Correa chuan hun tawp nan minute hnih chiah a awm tawh tihin chak nemnghehna goal a khung bawk.
La Liga lama talbuai mek Alaves lakah Valencia an talbuai hman a, hun engemaw chen chu 1-0 in an tlawm. Mahse, second half-ah tun season-ah harhtharna chang Spanish club hian an theihna an pholang a, Goncalo Guedes leh Rodrigo goal khung hmangin 2-1 in an mikhual team hi an lehthal.