Ronaldo a chhuak dawn lo

Real Madrid thiampuipa Cristiano Ronaldo chu a hlawh chungchangah a lungawi loh avangin chhuah a duh nia sawi ni mah se Real boss Zinedine Zidane chuan Manchester United nena sawizawm ni mek a player hi Santiago Bernabeu-ah a hlim thu a sawi.

Zidane chuan, "Engkim hi a la ngai vek a ni, Cristiano tel lohna Madrid hi ka mitthla thiam lo. He club chhungkaw zinga mi hi a ni a, hei hi a In chu a ni. Club, fans leh tupawh mai hian Ronaldo hi chu an hmangaih em em vek a ni," a ti.

French manager chuan sawi zawmin, "Kei chuan contract leh transfer chungchang tih vel sawi hi ka peih ve lo a, khelmual chhunga kan chet dan leh result hi ka sawi duh ber chu a ni," tiin thui tak a sawi chhunzawm duh lo zui.

Kum 32 mi Ronaldo hian kum 2009 khan United aṭangin Real hi pound maktaduai 80-in a zawm a, match 418 khelh sak tawhin goal 422 ngawt a khung tawh! Kum 2021 thleng Real-a cham tura contract nei player hian tun season La Liga-ah match 14 khel tawhin goal li chiah a la khung a, Champions League lamah erawh match ruk khelin goal kua a khung tawh thung.