PSG tana goal li khung thei Neymar

Footballer manto ber Neymar-a'n Paris St-Germain tan goal li a khung zanah Edinson Cavani chuan Zlatan Ibrahimovic record a nihrual bawk.

Nilaini zan zan French Ligue 1 inkhelah hmahruaitu PSG hian Dijon chu 8-0 in an sawp, PSG tan Barcelona forward hlui Neymar-a'n goal li a khung bakah Angel Di Maria chuan goal hnih a khung a, striker Cavani leh rawlthar duhawm Kylian Mbappe ten goal khat ve ve an thawh bawk.

Uruguay international Cavani hian Paris club tan inlena hrang hrangah goal 156 a khung tling ta a, Swede striker Ibrahimovic record nih rualin club tana goal khung hnem ber an ni–Cavani hian tun season chhungin a khum ngei ang.

PSG hian penalty an hmu a, Cavani-a'n club record siam theihna hun ṭha atan hmang thei mah se Neymar-a'n a pet thung. PSG boss Unai Emery chuan, "Neymar khan a khel ṭha a, a chet fuh ni a nih vangin penalty kha a pet awm tak zawk a ni," tiin a sawi.

Tun hnai an league match hnuhnung pariatah PSG hi an chak fai vek a, goal 31 khungin an lamah goal li chiah a lut thung. Ligue 1 hmahruaitu PSG hian match 21 khelhah point 56 hmuin hmahruaitu an ni zel a, anmahni hnaih bertu Lyon aiin point 11 zetin an sang fal zawk.