African player manto ber Bakambu

Cedric Bakambu chu African player awm tawh zinga manto ber a ni dawn–Villarreal striker hian Chinese Super League club Beijing Guoan chu a zawm dawn a, a man atana Chinese club insen tur zat hi pound maktaduai 65 a ni.

DR Congo international hian Villarreal-a a contract ang chuan pound maktaduai 35-a lei duh an awm chuan a chhuak thei ang, tih a ni. Beijing Guoan hian Spanish club hnena an pek tur zat tak chu heti zat hi a ni a, mah se China sorkara Bakambu lakluh mana an chhiah chawi tur nen chuan pound maktaduai 65 a ni.

Chinese club ten manto uchuak taka ram pawn player lei an chin avangin club reng reng chu euro maktaduai nga man chung lam an awm chuan player lakluh manah chhiah chawi tura tih an ni a, an chhiah chawi tur pawh hi an player leina man zat deuhthaw a ni–Beijing club pawhin chhiahah pound maktaduai 30 ngawt an seng dawn tihna a ni a, a tam tham hle.

Kum 26 mi Bakambu hian Beijing Guoan-ah medical a nei tawh a, he thuziak i chhiar meuh chuan Chinese club hi a zawm tawh hial mai thei–Liverpool-in African player manto ber ni tura pound maktaduai 34-a Mohamed Salah leh Sadio Mane an leina chu a khum dawn tihna a ni a, nipui transfer huna Reds-in Naby Keita mana pound maktaduai 48 an insen tur pawh a khum dawn tihna a ni.

Sochaux leh Bursaspor forward hlui hian Villarreal tan tun season-ah inelna hrang hrangah goal 14 khung tawhin club top scorer a ni mek a, nikum October thlaa goal ruk a khung khan African player zinga La Liga Player of the Month ni thei hmasa ber dinhmun a lo luah tawh.