Liverpool-in 'pul' hri an vei thar League Cup X; FA Cup X; Champions League X

Liverpool-in UEFA Super Cup nomawi chawi chungin season bul an ṭan a, December a herchhuahin FIFA Club World Cup nomawi an chawi bawk. 

Reds fan-ten nomawi tam zawk an mitthla a, treble champion nih an beisei - mahse kum 2020-in Liverpool ṭantute tan kum ṭha a herchhuahpui lo a, FA Cup an mangṭha hnuah Champions League an mangṭha ve leh ta.

Nilaini zan khan European champion hian Champions League last 16 second leg-ah Atletico Madrid an mikhual a, 3-2 a an tlawm avangin inkhel pahnih belhkhawmah 4-2 a chak loin an nomawi kawl lai chu an mangṭha. 

Liverpool hian Georginio Wijnaldum leh Roberto Firmino hmangin 2-0 in hma an hruai a, chakpui mai tura an inbeisei laiin goalkeeper Adrian chetsual an tuar - Marcos Llorente (2) leh Alvaro Morata ten goal rawn khungin Atletico an chak ta daih!

Jurgen Klopp-a'n Atletico an ngam loh tirh khan, "Anfield boruak an tem ve dawn alawm," tiin Spanish club lehthal thei an nih thu a sawi a, an rorelna hmun Anfield boruak ken tel a hrechiang. Liverpool-in inkhel ṭantir aṭangin na takin an nawr a, Klopp-a'n a sawi fo ṭhin 'heavy metal football' kan hmu - Atletico erawhin Cholismo system hnuaiah tlarhnung ven thupui berah an nei a, club pahnihin an thiam dan berin an khel ve ve. 

Reds tan Georginio Wijnaldum chuan an phu ang ngeiin minute 43-naah mawi zetin a rawn tauh lut a, Anfield thawm a ṭha hle - Barcelona laka an comeback ropui bul ṭantu kha Dutch midfielder hi a ni a, Reds fan-ten thawnthu hlui chu her lum a ni dawnah an ngai. 

Goal dang a luh loh avangin extra time khelh a ni a, minute 94-naah Roberto Firmino chuan Liverpool goal hnihna a rawn khung - April 2019 hnua a vawi khat nan Brazilian striker hian Anfield-ah goal a khung ve leh ta!

Liverpool-in mahni mualah 2-0 in hma an hruai a, quarterfinal an mitthla tawh a nih pawhin dem theih an ni lo. Mahse, goalkeeper chetsual vanga Champions League final meuha Real Madrid lo ngam lo tawh team an hlim rei lo. 

Goalkeeper manto Alisson inhliam vanga si ban nghaktu Adrian chuan awlsam taka ball petchhuah turah a pet sual a, Marcos Llorente ke bulah tak a tla. 

Liverpool defender-ten an keeper chetsual thup turin an hna an tlin tawk lo a, Llorente hian goal khung nan a hmang - Merseyside club-in chak tura an mamawh zat chu goal hnihah a kai chho. Mahse, goal an chhuah hnuah Liverpool-in ngai an awh tawh lo - defending ṭha lo vang bawkin Llorente chuan a goal hnihna a khung a, hun tawp rual deuhthawa Morata goal khung chu Kop ho vel ṭaptu a ni. 

Anfield-a inkhelah danglamna langsar ber lakchhuah dawn chuan goakeeper pahnih 'class' inthlau lutuk kha a ni ang. Liverpool-in Adrian-a tihsual an tuar a, Atletico-in Jan Oblak-a chet ṭhat zar an zo thung. 

Liverpool hian inkhelh chhung zawngin 71% ball an chang a, pet goal tumin vawi 34 zet shot an nei a, vawi 11 chu goal zawnah an pet - Oblak hian vawi kua save ṭha tak tak a nei a, cross hlauhawm tur a man zawng zawng nen chuan goalkeeper ṭha bik tih loh rual a ni lo. 

Reds-in inkhel an thlir kir apiangin Andy Robertson-a bar tauh per te, Alex Oxlade-Chamberlain-a shot Oblak-a'n ṭha zeta a dang te an thlirlet ang a, an ui tawlh tawlh ang. Liverpool tana si ban nghaktu Adrian-a'n Atletico tan thawhlehna remchang a siamsak piahlamah a positioning a chhe tluan zak a, FA Cup lakah a chetsual avanga Chelse an ngam loh tawh avangin inthlahrunna chang a hria a nih chuan inthlahrung tur a ni.