Vawiinah NorthEast football powerhouse nih inchuhna

Ṭha ber nih duhna hi khawvel ken tel a ni a, football khawvelah a danglam lo. Vawiin tlai dar 2:00 hian NorthEast-a football thiam ber state zawnna Rajiv Gandhi Stadium, Mualpuiah neih a ni dawn.

Mizoram aiawhin kawr sen nen Aizawl FC an pen chhuak ang a, Manipur aiawh tur chu Neroca an ni. Team dinhmun thlir pawhin I League match satliah a ni tawh lo a, Mizoram leh Manipur club inkhel a nih avangin India ram pawhin a ngaihven ang.

Power house = Mizoram?
Manipurin kum 2002 khan Santosh Trophy an chawi a, India ram champion an ni. Infiamna lama harh hmasa Manipur hi NorthEast state dang tluk phak rual lohin football lamah pawh an chungnung a, India ram club ṭhaah Manipur player-ten hmun pawimawh an chang.

Tun ṭuma Neroca player pawimawh zinga mi Gouramangi Singh chu Indian footballer zinga nuai 100 hlawh hmasa ber a ni a, Manipur hi footballer neih lansarh lamah chauh ni loin khelmual neih ṭhat lamah pawh Mizoramin a elpha lo hle.

Amaherawhchu Manipur hian tualchhung buaina vangin harsatna an tawk a, kum 2011-a Santosh Trophy final an thlen nawn hnuah sulhnu liantham an hnutchhiah tawh lo. All Manipur Football Association (AMFA) a chak tawk lo a, Manipur an tlahniam tih zep rual a ni lo.

Mizoram Football Association kaih­hruaina hnuaiah Mizoram football-in harhtharna a chang a, sorkarin khelmual ṭha a pek hmang ṭangkaiin Mizoram Premier League a buatsaih a, club inelna changtlung awm hnuah lang theiin Mizoramin hma a sawn.

Mizoramin kum 2014-ah Santosh Trophy an chawi a, National Games-ah gold medal an la zui a, hetah hian tawp mai loin Aizawl FC chu I League-ah an inpetling a, an champion zui bawk. Mizoram hian Manipur aiin I League club an nei hmasa a, AFC chu NorthEast club zinga I League champion hmasa ber leh awmchhun an ni.

NorthEast football powerhouse chu Manipur ni tawh loin Mizoram tiin a chhal theih a, amaherawhchu nikuma FIFA Under 17 World Cup-ah Mizoramin player pakhat chauh an thawh laiin Manipurin player pasarih a thawh a, he inelnaa India ram captain pawh Manipur rawlthar Amarjit Singh a ni.

NorthEast football powerhouse-ah Mizoram inchhal tawh mah se Neroca hmangin Manipur an ṭhang harh a, Mizoram an el ngam leh ta.

Neroca coach hmuhdan
Neroca coach Gift Raikhan chuan, "NorthEast football powerhouse chu Manipur an ni a, Mizoram hi powerpack an ni," tiin state pahnih chu an ṭhat ve ve thu a sawi.

Kum 36 mi Raikhan chuan, "Mizo naupang ṭhahnem tak ka enkawl a, an theihnaah rinna ka nghat. Pune Academy ka enkawl laiin Jeje, Rozama, Rintea, William-a leh David te ka enkawl a, Rintea kha theihna sang tak a ni a, a thih thu ka hriat pawhin ka rilru a na hle. Manipuri leh Mizote hi unau kan ni a, goal kan khung pawhin in lawmpui tur kan ni," tiin a sawi a, Bethlehem Vengthlang tana a khelh laia thi ta Lalrinawma Lianhna chanchin a sawi lai hian a hnuk a ulh.

Neroca fak zuiin Raikhan chuan, "Tualchhung football-ah chuan CC Meet te chuan entu la ngah reng mah se India ram pum huap angin kan lang lo. I League-a Neroca an tlin avangin Manipurah football a nung thar leh a, hmasawnna pawh a awm chho leh ang," tiin Manipurin kawng dik an zawh chhoh leh thu a sawi.

I League kai thar hian an mualah inkhel entu an ngah ṭhin a, chawhrualin entu 30,387 nei ziah ang an ni a, hemi kawngah hian Kolkata club ṭha Mohun Bagan (17,258) leh East Bengal (11,950) te pawhin an elpha lo hle.

Hetihlai hian Aizawl FC inkhel entu erawh chawhrualin 4539 an ni phak chauh. NorthEast-a Mizoram an chungnun zel theih nan Mizo mipui an ṭhanharh a ṭul a, Mizo club-in RG Stadium-ah Manipur club an hneh a pawimawh bawk.