Roger Federer chak niah Stan a tlu

Australian Open champion lai Roger Federer-a'n second round a paltlang niah season hmasa semifinalist Swiss tlangval Stan Wawrinka erawh a tla. Federer hian vawiin tlaiah Richard Gasquet a hmachhawn leh nghal dawn a ni.

Ningani khan Australia-ah khua a lum hle, Rod Laver Arena, Melbourne Park-ah 40C zet a ni. Khawlum hnuaia inkhelah vawi nga champion tawh Federer hian German tlangval Jan-Lennard Struff chu 6-4, 6-4, 7-6 (7-4) in a hneh.

Switzerland tlangval Federer a chak lai hian a hnampui Wawrinka chu US tlangval Tennys Sandgren hmaah 6-2, 6-1, 6-4 in a chak lo.

Wawrinka hian 2014 khan Australian Open nomawi hi a chawi tawh, hard court hi a inkhelh thiamna hmun a nih avangin kuminah hliam damkawr chungin a inlan. Season khat chhunga Grand Slam hmasa ber a khelh hma hian inbuatsaihna tournament a khel hman miah lo a ni.

Grand Slam vawi thum cham­pion tawh Wawrinka chuan, "Inelna ṭan hma lawk pawh khan ka la inkhel mumal thei lo a, ka beisei aia hmain ka inkhel thei. Match hnihnaah chak lo nghal mah ila season hmasa tawp lam aṭanga chawl tawh ka nih avangin ka match khelh chinah ka lawm," tiin a sawi.

Player langsar dang zingah Wawrinka bakah hian David Goffin a chak lo. Seeded pasarihna Goffin hi kum 36 mi Julien Benneteau nen set li an khelh hnuah 1-6, 7-6 (7-5), 6-1, 7-6 (7-4) in a chak lo.