February thla tirah grass phah ṭan dawn

Sairang Dinthar-a Mizoram Football Association khelmual chu February thlatir aṭangin grass phah ṭan a ni dawn. Nimin khan FIFA South Asia development officer Prince Rufus chuan Aizawl lo thlengin MFA khelmual hi a tlawh a, grass phah ṭan hun a tihchian rual hian contractor thlan fel a nih tawh thu a sawi.

Mizoramin football-ah result ṭha an nei a, MFA hruaitute FIFA nen an intlunzawm ṭhat bawk avangin khawvela football thuneitu sang ber hian artificial grass hi Mizoramin football-a hma sawn zel theih nan a pe a ni.

Prince Rufus rual hian AIFF chief operating officer Kishore Taid leh Richard Hood, AIFF head of players development te an lo kal bawk.

FIFA leh AIFF aiawh lo kalte hian nizan khan MFA Futsal League a tlawh nghal. FIFA-in futsal hmasawnna tura ke a pen rualin Asian Football Confederation pawhin ṭan a la a, futsal lamah India chu hmasawntir tumin a pui chho mek tih Prince Rufus chuan a sawi a. MFA-in Futsal League a kalpui chu lawmthu a sawi a, India state dangin chhunzawm se a duh thu a sawi bawk.

AIFF COO Kishore Taid chuan Futsal lamah AIFF-in tan a lak tur thu a sawi a, chumi kawngah chuan Mizoram chu sulsutu an nih theih a beisei thu a sawi.

Vawiin chawhma hian AIFF lam kaihhruaiin R. Dengthuama Hall-ah Grassroots, Baby League & Youth Development chung­chang Workshop neih a ni dawn a, Mizorama naupang lam inkhel kalpui dan an hre duh a, naupang enkawlna kawnga AIFF hma thlir an sawi bawk ang.