India team-ah Sindhu leh Srikanth

Asian Team Championship chu February 6-11 chhungin Malaysia-ah neih a ni dawn a, India pawhin Badminton team a tir dawn – India tan hian Olympic silver medalist PV Sindhu leh world number 3 Kidambi Srikanth te an inlan ang.

Asian Championship hnuhnung zawk, kum 2016-a Hyderabad a neih zawh takah khan India mipa team hi semifinal-ah Indonesia hneh loin an tla a, hmeichhe team pawh quarterfinal-ah South Korea hneh loin an tla bawk.

Badminton Association of India (BAI) chuan kuminah hlawhtlinna chan tumin team ṭha tak din a tum a, inelna hi Bangkok, Thailand-a neih tur Thomas & Uber Cup khelh theihna kawng a nih nghal dawn avangin BAI chuan a ngai thutak hle. Thomas Cup hi vawi 30-na tur a ni a, mipa inelna a ni a. Uber Cup hi hmeichhe inelna ni thungin kumin hi vawi 27-na tur a ni a, ram 16 ve ve an inlan ang.

Mipa team-ah hian season hmasa chhunga Super Series title pali la thei Srikanth bakah H S Prannoy, Sai Praneeth leh Sameer Verma te an awm.

Indian shuttler zinga Olympic silver medal la thei hmasa ber Sindhu leh world number 1 hlui Saina Nehwal te chu hmeichhe player langsar an ni dawn a, anni bakah hian Krishna Priya leh Ruthvika Gaade te pawhin ram tan an khel dawn bawk a ni.