Arsenal an ṭha sawt dawn?

Arsenal manager Arsene Wenger-a'n a forward Alexis Sanchez chuan Manchester United a pan ngei a rin thu a sawi a, hemi rual hian Pierre-Emerick Aubameyang leh Henrikh Mkhitaryan te chungchang a sawi lang tel nghal bawk.

Gunners hian United lakah Sanchez an hralh a nih chuan Old Trafford aṭanga Henrikh Mkhitaryan lakluh an duh thung. January thla chhungin Theo Walcott-a'n Everton a zawm san tawh a, thlaktu awm loa Sanchez an chhuahtir leh a nih chuan an squad a pan sawt dawn tih chu thil chiang sa a ni.

Mahse, North London club hian an player hellaite hi Emirates Stadium-ah an lalut thei a nih chuan ṭhatpui tham an ni ang. Tlarhnung thuam chak turin West Brom defender Jonny Evans an ngaihven tel bawk nia sawi a ni. Thlasik trasfer bazar hun atan ni 12 chiah hun a awm tawh–Gunners hmel hi a danglam hlawk dawn niin a lang.

Ta se...
Arsenal hian an captain leh goal khung khawl ni bawk Thierry Henry leh Robin Van Persie te chu Barcelona leh Manchester United lakah an chan tawh a, anni hian league nomawi an chawi zui thei. Striker ropui pahnih hnungzuiin Sanchez hi chhuak ta se Arsenal hi engtin nge an awm ang tih chu football khawvel hriat chak a ni.

Barcelona forward hlui Sanchez hian Arsenal tan FA Cup a chawi tawh a, season tawp ruala a contract zo tur a pawh sei duh loh chhan hi nomawi chawi a duh vang chu ni bawk mah se sum tam zawk hlawh a duh vang niin a ngaih theih.

Chile international hi season hmasa Arsenal tana goal khung hnem ber a ni a, tlarhmaah chuan a laiah leh sirah a khel kawp thei. A chhuak a nih chuan player mal awmsa zingah a hmunruak luahkhat zo an awm dawn lo.

Mahse, Arsenal hian Dortmund hmatawng Aubameyang bakah amah thlawp turin ball thiam leh tlan chak Mkhitaryan an lalut thei thung a nih chuan goal khung kawngah Sanchez hi a thlak zo tura ngaih a ni.

Armenian international Mkhitaryan hi Aubameyang nen Dortmund tana khel dun tawh an ni a, 2015-16 season a ṭhiante goal khung tur vawi 15 siamsakin Bundesliga Players' Player of the Season atan thlan a ni–an inkawp rem hle ang tih a rin theih.

Aubameyang a hnai?
Bundesliga top scorer Aubameyang hi kar hmasa khan club meeting a kal loh avangin Wolfsburg nen league match khelh tir a ni lo a, inkhelh banah manager Peter Stoger-a'n, "Match lehpekah chuan a khel tawh ang," a ti.

Amaherawhchu, Stoger thusawi ang lo takin nizana Hertha Berlin nen an inkhelh ṭumin squad-ah telh a ni lo bawk. Dortmund sporting director Michael Zorc chuan, "Inkhel turin 100%-in a rilru a inpeih lo," tiin a sawi.

Gunners manager Wenger-a'n thuthar thehdartute hmaah Gabon international hi an team tana khel thei tur chi player a nih thu a sawi a, Wenger thusawi hi Dortmund lam chuan an helh hle.

Kum 28 mi Aubameyang hian season hmasa khan Bundesliga-ah goal 31 a khung thei a, ani aia khung tam an awm lo. Tun season kal laiah pawh match 15 khelh tawh aṭangin goal 13 a khung leh tawh–tunlai striker hmuhnawm leh goal khung thei berte zinga mi a ni.

Dortmund sporting director Michael Zorc chuan, "Arsenal nen hian inbiakna kan la nei lo, Arsene Wenger hian midang player ni loin ama player khelh dan hi ngaihtuah zawk rawh se," a ti. Zorc hian Wenger chetdan chuan an club a zah lo hle tiin a sawi bawk.

Premier League-a beisei phak lo Arsenal hian nomawi beisei ngam tawh lo mah se season thara Champions League khelh ngei an duh, zanin dar 8:00 hian table hnuai lama talbuai mek Crystal Palace an mikhual ang.