Henderson-a'n training a zawm

Liverpool captain Jordan Henderson chuan malpui hliam vanga thla khat zet a hmel a lan tawh loh hnuah ngai a awh ve leh ṭan tawh a, nimin khan club full training a zawm.

English midfielder hian December 22 khan Arsenal nen an inhmachhawn ṭumin hliam hi a malpuiah a tuar a, hemi hnu hian Reds tan a inlan leh tawh lo. Liverpool boss Jurgen Klopp chuan a player hi a dam chak thu a sawi a, Pathianni zan dar 1:30-a Swansea City an lenchilh hunah erawh a inlan theih a la beiseiawm loh.

Liverpool fan-ten chanchin lawmawm dang an nei a, pound maktaduai 75 man defender Virgil van Dijk chu Swansea hmachhawn tur hian a dam tawh. Dutch defender hian Reds tana a match hmasa bera Everton laka goal a khung hnuah hliam a nei zui a, Manchester City laka 4-3 a hnehna an chan ṭumin a inlan lo.

Southampton defender hlui awm loh hlan hian Dejan Lovren leh Joel Matip chu tlarhnungah inkawpin City an hmachhawn a, Klopp-a'n Van Dijk inkhel bul a ṭantir dawn leh dawn loh a la hriat loh.

Kar ruk zet a chawlh hnuah Alberto Moreno chuan club training pangngai a zawm leh tawh bawk a, Spanish defender inhliam hlan hian a hmun ruakah Andrew Robertson a khelh ṭhat avangin Sevilla defender hlui hian a hmun ngai chang let tur chuan a beih ve viau a ngai ang.