Manchester City tan Silva a inpeih

Premier League hmahruiatu Manchester City chuan zanin dar 11:00 hian kai thar Newcastle an hmachhawn dawn a, midfielder David Silva chuan harsatna nei loin team training a zawm thei tawh a, inkhel bulṭan turin a inpeih.

Pep Guardiola nauten tun season-a an chak loh vawi khatna ni turin an match hnuhnung berah Liverpool an ngam lo a, Magpies lakah ropui taka thawh chhuah nghal an tum dawn.

Man City hian Newcastle lakah sulhnu an nei ṭha hle, an intawn hnuhnung league match 20-ah chak loh an nei lo - Premier League club mal bikah result an neih ṭhat berna a ni.

Spanish manager kaihhruaina hnuaia player pawimawh ber pakhat Silva hi a dam ṭha a nih chuan inkhel bul ṭantu zingah a tel ṭhin. Valencia player hlui hi tun hnaiah chhungkaw thil vangin a inkhel thei lo zeuh zeuh a, Reds an hmachhawn ṭuma bench lama hun hmantir a nih chhan erawh a pum lam chian loh vang a ni thung.

Reds an hmachawn ṭuma hliam tuar Fabian Delph aiah Danilo a inlan tura ngaih a ni a, midfield-ah Silva-a'n bul a ṭan a nih chuan Ilkay Gundogan a awl thung tura ngaih a ni.

City player hliam an dam a, midfield-a khel tur an ngah. Midfielder Fernandinho-a'n City tan a rinawm zia lantir nan kum hnih daih contract a ziak hlim a, Brazil international hi Spanish manager hnuaiah player pawimawh a ni phak bawk.

Ningania kum 47 tling hlim Pep hian, "Team ṭha tak Liverpool lakah kan chak lo a, kan match lehpekah chuan chak kan tum ang, league nomawi kan chawi theih nan a tawp thlengin kan bei tur a ni," tiin a sawi tawh. Table-a 15-na Magpies tan Etihad Stadium-a hnehna chan tum ai chuan point khat hmuh tum a finthlak zawkin a rinawm.