Marta Kostyuk daltu Svitolina

Tleirawl duhawm Marta Kostyuk tan Australian Open zinkawng a tawp. Kum 15 mi Kostyuk hi Elina Svitolina lakah a chak lo a, Grand Slam a khelhna hmasa bera a thlen chin chu third round a ni.

Ningani zan Melbourne Park-a inkhelah kum 23 mi Svitolina hian minute 59 chhungin world number 521 Kostyuk lakah hian 6-2, 6-2 in hnehna a chang. Kum 1997 hnu lamah Kostyuk hi major tournament-a third round lut thei naupang ber a ni a, last 16 lut thei naupang ber nih a tumna erawh a tawp.

Seeded palina Svitolina chuan, "Ukrainian hmeichhe pahnih kan intawng kha a pawi ka ti, kawng thui zawk zawh dun thei ila a duhawm hle. Kostyuk khan min bei let thei em em a, a tawp thlengin a ṭang thei, hmabak êng tak a nei a ni," tiin a sawi.

Inkhel dangah seeded pakhatna Simona Halep chuan darkar khat leh minute sarih chhungin Eugenie Bouchard chu 6-2, 6-2 in a hneh bawk. Romanian nula Halep hian a match hmasa zawkah Destanee Aiava a hneh tawh a, a vawi khat nan Grand Slam nomawi a beisei mek–vawiin hian Lauren Davis a hmachhawn leh ang.