Hma hunah Robben a buai lo

Bayern Munich winger Arjen Robben chuan season tharah khawi club tan nge a khelh dawn tihah buaina a neih loh thu a sawi.

Netherlands internatonal hlui hian tun season tawp thleng bak chu Allianz Arena-ah contract a nei tawh lo. Robben hian a contract a pawt sei lo a nih chuan a duh lam a hawi thei dawn tihna a ni a, inkhelh a chawlhsan hnai nia sawi pawh a awm.

Nikum December thla khan Bayern chairman Karl-Heinz Rummenigge chuan Robben leh Franck Ribery te contract chungchangah inbiakna an neih mek thu a sawi tawh.

Mahse, tun hnaiah Robben hian inbiakna a awm loh thu a sawi thung, "Club nen inbiakna a la awm lo, mahse hei hi chu buaina tur a ni lo. A pawimawh ber pakhat chu hriselna ṭha neih a ni a, khelmual chhunga inlan tam theih a ngai bawk," tiin a sawi.

Kum 33 mi Robben hian Bayern Munich tan Bundesliga nomawi vawi ruk a chawi tawh a, tun season-ah pawh match 12 a khelhah goal thum khungin league table-ah point 13 zetin an sang fal leh tawh – Pathianni zan hian Werder Bremen an mikhual ang.