Euro Nopui Rome-ah nge Home-ah?

European Championship 2020 chu June 11, Zirtawpni aṭangin Rome-ah ṭan a ni a, July 11, Pathianni zan dar 12:30 hian football hmunpui tia an sawi Wembley Stadium-ah khar a ni dawn.

England-in a vawi khat nan Euro final an lut a, World Cup 1966 hnua a vawi khat nan inelna lianah nomawi an beisei. Gareth Southgate-a hote hmaa ding tur hi World Cup nomawi vawi li leh Euro nomawi vawi khat chawi tawh Italy an ni.

TV colour hnua a vawi khat nan England-in final an khel dawn. English mipui chuan 'Football a rûnah a lawi dawn e' an ti a, Italian mipui lamin 'Rome-ah zawk' an ti. Pathianni zanah Home-ah nge Rome-ah Euro Nopui a kal dawn tih chu a hriat ang.

Beiseina thar
Wembley Stadium-ah England-in kum 1966 khan West Germany hnehin World Cup nomawi an chawi a, he stadium-ah tho hian kum 1996 khan Euro semifinal-ah penalty shootout hmanga Germany hneh loin an tla.

Three Lions chak loh ṭum hian Gareth Southgate-a'n penalty a hlah a, penalty-ah chuan vanduai theih a nih miau avangin coach Terry Venables leh English mipui Southgate-a hnungah an ding tlat.

Kum 2002 khan Wembley Stadium hi an ṭhiat a, a hmaa aia ṭha zawkin an din thar. Wembley Stadium thar chu March 9, 2007 khan hawn a ni. Stadium tharah hian England-in kum 25 liam taa veltu Germany lakah Southgate hoin phuba an la.

England leh Germany inkhelh hi Euro 2020 last 16 a ni a, English mipuiin vanduai nawn an hlau. Amaherawhchu Southgate-a hote hian inkhel thunun chungin Raheem Sterling leh Harry Kane te goal hmangin an hneh. Inkhelh zawhah Euro 96-a penalty hlahtu Southgate-a'n lawm avangin a ban pahnih a phar chhuak a, a penalty dansaktu Germany goalkeeping coach ni ta Andreas Kopke a indawm kun ta thung.

Chutihrualin Three Lions hi Germany an hneh vang ringawta beiseina nei an ni lo a, Southgate-a hnuaia an khelh dan thlir hian nomawi an beisei hi a dik thlap. FIFA World Cup 2018-ah khan England hi Southgate-a hoin semifinal an lut tawh a, UEFA Nations League 2019-ah pathumna an ni leh bawk.

Euro final hi Wembley Stadium-ah khelh a ni dawn a, Germany an hneh ṭumin mipui an pawimawh a, Denmark nen an inkhelh ṭumin entu 64,547 zet an pung khawm. Hei chauh hi a ni lo, Three Lions hi World Cup 2018 leh Premier League-a vawi thum top scorer Harry Kane bakah Raheem Sterling leh khawvel defender man to ber Harry Maguire te telna a ni. Football a rûnah a lawi dawn e.

Hlauhna tel lo
England hmachhawn tura Italy an rawn inlan hunah chuan player, coaching staff leh mipuiin an hnam hla 'Fratelli d'Italia' chu an theihna zawng zawngin an rawn sa dawn. Azzurri hian England hi anmahni ṭantute hmaah hneh an châk zek zek tawh ang.

Italy captain Giorgio Chiellini-a'n Spain nen penalty an pet hmaa La Roja captain Jordi Alba a fiam dan velah khan kum 36 mi Chiellini leh a ṭhiante hian an game ngai reng khel turin huaisenna an nei ang. An game ngai reng han tih hian Roberto Mancini hnuaia an khelh dan a ni a, Manchester City manager hlui hnuaiah an khelh dan a nghet ṭha hle.

Chutihrualin Azzuri hian kum 1968-a Euro nomawi an chawi hnuah kum 2020 leh 2012 khan final ṭum hnih lut leh tawh mah se nomawi an la chawi leh lo. World Cup hnuhnung bera tel pha lo Italy hian Mancini hnuaiah harhtharna an chang a, tuna an hun ṭha neih hi bawhpelh an duh lo ang.

Italian chanchinbu La Gazzetta dello Sport chuan 'Senza Paura' tih thupui an hmang a, a awmzia chu 'Hlauhna tel lo' tih a ni. Chanchinbu dang Corriere dello Sport chuan an ram team hi chak leh huaisen bakah inlungrualna ṭha nei leh chapona nei lo tiin an fak thung.

Inelna lianah Italy hian England hi hneh loh an la nei lo a, Euro Nopui hi Rome-ah a kal zawk a nih pawhin mak ti suh ang che.

Ngaihnawm
• Italy leh England te vawi 27 an inkhel tawh a, Azzurri vawi 11 chakin England vawi riat an chak a, vawi khat an inhnehtawk.
• Ram pahnih hi an intawn hmasak pariatah vawi khatmah chak an nei lo a, England hi an intawn hnuhnung pasarihah vawi khat chiah an chak.
• Inelna lianah Italy-in England hi hneh loh an la nei lo. World Cup 1990 khan pathumna inchuhnaah Azzurri hi 2-1 in an hneh a, World Cup 2014 group stage-ah Italy hian 2-1 thoin an hneh.