Copa America 2021 Final Argentina vs Brazil

Pathianni zing dar 5:30 hian Brazil rama stadium lian leh hmingthang Maracana Stadium-ah Copa America 2021 final khelh a ni dawn. World champion vawi nga ni tawh Brazil leh Argentina ten nomawi an inchuh ang.

Pele leh Diego Maradona hun a liam a, tunah chuan Lionel Messi leh Neymar hun a ni. Club lama hlawhtlinna tinreng dawng tawh player ropui pahnih hian an ram tan nomawi lian tham lak an tum dawn.

Mizoram aṭang chuan Sony Ten 2-ah live a en theih a ni ang.

Messi leh Neymar tan Thangchhuah turin nomawi a ngai
Player ropui chungchuang, club tana nomawi chawi theih zawng zawng chawi tawh - mimal chawimawina sang zawng zawng pawh hui vek tawhtu Lionel Messi-a'n hmabak pakhat a la nei, chu chu Argentina tana nomawi chawi a ni.

Pound maktaduai 200 man, khawvela player manto ber ni bawk Neymar-a'n club tan hlawhtlinna hrang hrang a chang tawh - Brazil tan erawh nomawi lian tham chawi a la nei bik lo, a tan Copa America title lak aia châkawm tur dang a tam lo ang.

Brazil leh Argentina ten Pathianni zing dar 5:30 hian Maracana Stadium, Rio de Janeiro-ah Copa America 2021 final an khel dawn. FIFA World Cup champion hnem ber Brazil (5 titles) leh La Albiceleste (2 titles) te hian football mawina an pholang leh dawn.

Inbeihna tur
Pele leh Diego Maradona chung-changah ram pahnih ngaihdan a inang lo. Brazil hi world champion hnem zawk ni mah se Argentina hian an chung en ngai bik lo. Messi pawh mimala record nei ṭha ni mah se Selecao tan chuan Neymar thiamna a nep bik chuang lo.

Messi-a'n inelna kal laiah goal li khungin a ṭhiante khung tur vawi nga a siamsak tawh! Knock out stage chinah chuan match tinah goal emaw assist emaw a la nei ziah, goal thum khung tawh Lautaro Martinez nen an inkawp hi Marquinhos leh Thiago Silva ten dan an tum ang.

Champion lai Brazil lamin mimala goal khung hnem fal an nei lo, forward Neymar-a'n goal hnih a nei tawh a, goal khung tam tawk lo mah se Paris Saint-Germain star hian a ball thiamna hmangin an khingpui tlarhnung a chhaih buai hneh
thei hle.

Hrem vanga Gabriel Jesus inlan thei lo tur hi La Albiceleste tlarhnung lam tan chanchin lawmawm a ni ang. Mahse, Tite-a'n tlarhma lama chhawr tur a haihchham chuang lo - Richarlison, Everton Soares leh Lucas Paqueta te a la nei. Lyon midfielder Paqueta-a'n quarterfinal leh semifinal-a an goal neih chhun pahnih a khung, ani hi a sir lama tlan ten hmun ruak an siamah a rawn dawk chhuak ṭhin. Ani ven hi Argentina midfielder Guido Rodriguez tan hna pakhat tur a ni ang.

Duhthusam
Colombia hneha final an luh hnuah Messi chuan, "Ka duhthusam ber chu Argentina tana nomawi chawi a ni. A tirah tum sang tak neiin bul kan ṭan a, final hial kan thleng ta, tunah chuan a hma aia sang zawk kan tum leh ang," tiin a sawi.
Ram tan match 150 a khelh aṭanga goal 76 khungtu Messi hian ram tan final a khelh tawh paliah chak ni hmel a la hmu lo, a vawi nganaah tal chuan hlawhtlin a tum ruh hle - kum 34 a tlin tawh avangin Copa America bikah phei chuan a hun ṭha hnuhnung a ni tawh ang.

Argentina manager Lionel Scaloni-a'n, 2018 World Cup hnua team enkawl hna a thawh hnuahin team nghet tak a din tawh. An match hnuhnung 19 zeta tlawm nei lo team hian 1993 Copa America hnua a vawi khat an an ram champion pui an tum dawn. Brazil tan pawh a zawna Copa nomawi chawi a châkawm, hlawhtlinna chan pawhin team ropui hneh chunga champion chu a hlu bik ngei ang. Neymar chuan, "Argentina ka duh, chuan chak ngei bawk ila," tiin final atan duhthusam a lo sawi tawh.

Neymar chauh ni loin khawvel mipuiin Brazil leh Argentina ten final khel se tih hi an duhdan a nih a rinawm, ram ropui pahnihin final chu an khel dawn ta ngei a, hamrik hnuhnung a rik hnuah mittui chi hnih a luang dawn - lawm avanga mittui tla zawk nih an tum ang.

Inlan tura beiseite:
Argentina: Emiliano Martinez; Nahuel Molina, German Pezzella/Cristian Romero, Nicolas Otamendi, Nicolas Tagliafico; Rodrigo De Paul, Guido Rodriguez, Leandro Paredes/Giovani Lo Celso; Lionel Messi, Lautaro Martinez, Nicolas Gonzalez.
Brazil: Ederson Moraes; Danilo, Marquinhos, Thiago Silva, Renan Lodi; Casemiro, Fred, Lucas Paqueta; Everton Soares, Richarlison, Neymar.

Argentina keeper Martinez
Sergio Goycochea kha in la hria em? A rei deuh tawh nain Argentina leh Diego Maradona tuipui hman chuan in la hre ngei ang. 1990 FIFA World Cup dawn kha a ni a, khawvelin Maradona a buaipui. Group stage-ah Argentina keeper number 1 Nery Pumpido a inhliam a, inelna hmachhawn phak lo tura ngaih Goycochea tan hun ṭha a inher chhuak - Goycochea hian quarterfinal leh semifinal-ah penalty a dang, an ram hi a thlengtu Yugoslavia leh Italy lakah a chakpui hial.

Inelna ṭan dawna hriat hlawh lo Goycochea hi final an khelh dawn meuh chuan mipui ngaihven a ni tawh. Amaherawhchu, vanduai thlak takin West Germany hneh loin Argentina hian pahnihna ni chungin inelna an hmang zo.

Martinez ve thung
Mar del Plata, Argentina-ah 1992 khan a lo piang a, a hming chu Emiliano Martínez a ni. Kum naupang te ni chungin Arsenal a zawm a, senior team a zawm hnuah erawh khelhna hmun a chang thei mai lo.

Gunners hian season 10 chhungin club hrang hrangah loan hmangin an chhuahtir a, a tam hun ṭha a inhawng thei lo. Mahse, 2019-20 season tawp lamah Berd Leno inhliam vangin Martinez hian goal venna remchang a hmu hlauh. A hun ṭha hi a bawhpelh lo, FA Cup champion an nih theih nan leh Community Shield an lak theih nan a khel ṭha a, amaherawhchu thawhthu a la danglam thei lo, hmun nghet a chan miau loh avangin inkhelh tam theih beiseiin Aston Villa a pan.

Engtin zel...
Premier League-ah season duhawm a hman miau avangin Copa America khel tur Argentina squad-ah koh tel a ni. Ram tan pawh a thawnthu ṭha lo hi a la tawp thei lo, si ban nghak tur hian Franco Armani chu rin hlawh zawk a la ni. Mahse, Armani hian hri leng a kai hlauh, dam tawh mah se an inkhaih-hruai danah Copa a khel thei lo - a vanduaina hi Martinez tan hun ṭha her chhuah puitu a lo ni ve leh thung; khel phak loh tura ngaih khan a tir aṭangin hna pawimawh a thawk.

Chile lakah penalty a dang a, semifinal-a Colombia an hneh theih chhan chu Martinez bawk a ni - penalty vawi thum a dang! Final-ah a thlengtu Brazil a hmachhawn dawn, Goycochea angin an ram hi pahnihna a nihpui dawn nge a champion pui zawk dawn tih chu ka hre thuai dawn.