Wimbledon : Barty hmachhawn tur Pliskova

Tennis inelna upa leh ngaihhlut hlawh Wimbledon hmawr bawk a hnai. Zanin hian hmeichhe singles final an khel dawn, dar 6:00 aṭangin an live ṭan ang - world number 1 Ashleigh Barty leh Karolina Pliskova ten nomawi an inchuh dawn a ni.

Australian nula Barty hian Ningani zan khan Angelique Kerber 6-3, 7-6 (7-3) a hnehin a vawi khat nan final a lut. Semifinal inkhel dangah Pliskova chuan set hloh hmasa zet mah se Aryna Sabalenka chu 5-7, 6-4, 6-4 in a hneh.

Barty chauh a ni lo, a khingpui tur Pliskova tan pawh Wimbledon final a khelh vawi khatna tur a ni dawn. Tun hmain player pahnih hi vawi sarih an intawng tawh, record nei ṭha zawk Barty hian ṭum nga hnehna a chang.

Number 1
Tun hmain Barty hian Wimbledon champion nih chu a duhthusam a nih thu a sawi tawh ṭhin, a naupan laia a ngaihsan em em Evonne Goolagong-i'n Wimbledon title a lak aṭanga a kum 50-naah champion ve leh turin match khat chak a la hmabak.

All England Club-ah hian kum 1980 daih tawh khan Goolagong-i'n nomawi a chawi a, a hnu lamah chuan Australian nula zingah Barty hi final lut leh thei hmasa ber a ni chauh; Australian mipui ten an nghah rei a ngai hle.

French Open-ah khan Barty hi a inhliam, second round a khel zo thei lo. Wimbledon hmain a dam hman a, tournament ṭan hma khan inkhel tura a inpeih thu a sawi, tunah chuan a dam chiang tih a takin a lantir tawh.

Kum 25 mi Barty chuan, "Inrinni zan hian ka duhthusam ṭhin chu a taka tih hlawhtlinna hun ka nei thei dawn. Hringnunah hian chet fuh leh fuh loh lai a awm ṭhin, tun ṭuma final kan khelh tur hi ka chet fuh ṭum a nih ngei ka beisei," tiin a sawi.

Pliskova a zam lo
Sabalenka lakah bul a ṭan fuh lo, a nihna takah chuan Pliskova khan a khingpui service kha a chai hlei thei lo a ni. Mahse, set a hloh hnuah pawh a talbuai duh chuang lo, darkar khat leh minute 53 an khelh zawh meuh chuan a chungnung zawk a ni.

Pliskova hian Sabalenka lakah vawi 13 ngawt aces a siam thei, a khingpui (18 aces) aiin siam tlem mah se, final-a a khingpui tur Barty-i'n semifinal lehlama a siam (8) aiin a ṭha zawk a, a service ṭha tak hi a hmachhuan tur a ni ang.

Kum 29 mi Pliskova chuan, "Tun hma chuan fourth round ka la pel ngai lo, tunah chuan final a ni ta rup mai. Ka tan chuan final luh hi a ropui, chutih rualin a hmawr erawh ka la bawk lo tih ka hria, hmabak ka la nei," tiin champion ngei a tum.

Seeded pariatna Pliskova hian final lut turin match ruk a khel a, semifinal bika set a hloh tih loh chu set hloh a nei lo. Final-a a hmachhawn tur Barty erawh player ṭha zawk a ni a, hneh tur chuan a tir aṭanga chetsual loh a pawimawh ang.

Mipa Singles Final
Nizan khan mipa singles semi-final khelh a ni a, result kan hre hman lo. Pathianni zanah mipa pawh hian All England Club-ah a hmawr bawkna hi an nei chhunzawm ve nghal dawn a ni. Semifinal-ah hian champion lai leh world number 1 ni bawk Novak Djokovic leh Denis Shapovalov an intawng a, inkhel lehlamah Matteo Berrettini leh Hubert Hurkacz te an inhmachhawn thung.

A thiam zual pali zingah Djokovic chiah hi tun hma lama Grand Slam title la phak a ni. Serbian star hian season kal laiah Australian Open leh French Open title a la tawh, Wimbledon a la leh a nih chuan major title lak hnem lamah Roger Federer leh Rafael Nadal (20 titles) a nih rual ang.