Match hnih chak thei Suns dinhmun a ṭha

NBA Finals khelh laiah match hmasa pahnih chu Phoenix Suns lamin an la. Suns hian nimin zing khan Milwaukee Bucks chu 118-108 in an hneh a, champion turin match hnih chak chiah an mamawh tawh.

Suns tan hian Devin Booker-a'n point 31 a nei a, ani bakah hian Mikal Bridges (27 points) leh Chris Paul (23) te a che ṭha bawk a, team pumpui hian game 1 lama an point net zat chiah bawk neiin hnehna an chang.

Bucks thiampuipa Giannis Antetokounmpo a che na. NBA Most Valuable Player vawi hnih ni tawh hian minute 40 chhungin point 42 ngawt a nei, mahse thlawptu a nei ṭha lo. A ṭhiante zingah point 20 nei tling thei an awm ve lo a, a hna thawh hi chak nan a tawk zo lo.

Phoenix Suns erawhin an mamawh tawk point an nei thei, an chak chhan langsar tak erawh basket an ven him dan a ni. Quarter hnihna bikah phei chuan Suns hi 30-16 in an fal thei, quarter dangah erawh an hniam zawk - quarter hnuhnung ber bikah an intluk tawk thung.

NBA Finals game 3 hi July 12, Thawhṭanni zing dar 5:30-ah an khel leh ang. Bucks khelmual Fiserv Forum lamah a ni tawh dawn a, inkhel result a danglam a nih pawhin a mak lo ang.