Final duhthusam : Italy vs England

European Championship 2020 final-ah inelna thlengtu England an inlan dawn a, hei ringawt pawh hi Premier League en tam Mizo ṭhahnem zawk tan chuan final duhthusam a ni tawh. Three Lions khingpui tur hi football ram ropui Italy an nih leh zel avangin kumin Euro final hi en a châkawm takzet.

Team ṭha chu
Roberto Mancini kaihhruai Italy hian match 33 chhung chak loh an nei tawh lo. Azzuri chak loh hnuhnun ber chu September 10, 2018 daih tawh kha niin Portugal chu 1-0 in an hneh lo a, hemi hnu hian chak loh an nei tawh lo.

Italy hian kum 2019, 2020 leh 2021-ah hneh loh an tawng tawh lo a, Mancini hnuaia an record hi a ṭha hle. Euro 2020 semifinal-ah Spain lakah harsatna tawk deuh mah se Azzuri hian final khelh hi an phu a ni.

England hian nikum November 15 khan Nations League-ah Belgium an hneh lo a, hemi hma lawk October 14-ah Denmark 1-0 in an hneh lo. Mahse, Gareth Southgate hnuaia England team hi tun hnai bikah chuan Azzuri aiin record an nei ṭha zawk.

Three Lions hian World Cup 2018-ah khan semifinal an thleng a, Italy erawhin inelna an hmachhawn pha lo hrim hrim. Nations League hmasa berah semifinal lutin Switzerland hnehin pathumna an ni.

Mancini-a'n team ṭha tak a din ang thoin Southgate-a'n team nghet ṭha tak a siam a, an ṭha ve ve tih hi tun hnaia an record-ah hian a chiang hle.

Donnarumma vs Pickford
Italy goalkeeper Gianluigi Donna-rumma hian knockout stage chinah match tinah goal khat zel a chhuah a, goal thum a chhuah zinga goal khat hi Romelu Lukaku-a'n penalty aṭanga a khung a ni.

England keeper Jordan Pickford-a'n record a nei ṭha zawk a, semifinal-a goal khat a chhuah bak goal dang a la chhuah lo. Amaherawhchu Italian keeper hi ṭha zawka ngaitu an tam a, a san zawng hi 6ft 5in a sang a nih avangin a rinawm nghal hle.

Pickford erawh Donnarumma aiin inches liin a hniam a, 6ft 1in-a sang a ni thung. Chutihrualin 'shot stopper' ṭha mi Pickford hi a khelh ṭhat ṭumah erawh keeper ṭha tia sawi tur a ni pha a, Germany nen an inkhelh ṭuma Kai Havertz-a volley a dan te chu pui tak a ni.

Italy tlarhnunga Giorgio Chiellini (K-36) leh Leonardo Bonucci (K-34) te inkawp kum belh khawm hi kum 70 a ni a, ram tana an khelh zat belh khawm pawh 209 a tling tawh. Jose Mourinho phei chuan Italian defender pahnih hi Harvard University-ah defending an ziritir thei ang, ti hialin a fak tawh.

Chiellini leh Bonucci te hian Harry Kane chelh an tum dawn a, inkhel result atan a pawimawh ang. Kum 2018 khan Champions League last 16-ah Juventus leh Tottenham an inkhel a, Bonucci erawh hemi season hian Milan tan a khel. Kane hian Turin-a khelh first leg-ah a pet goal a, 2-2 in an inhnehtawk. London-ah Juve hi 2-1 in chak a, Chiellini hi a khel ṭha takzet. Chutihrualin veteran defender hian Kane a tawh khirhzia chu a hriat phah ngei ang.

Di Lorenzo vs Sterling
Chiellini leh Bonucci ten Kane lama rilru an pek lutuk chuan Giovanni de Lorenzo leh Raheem Sterling te an in bi tum dawn tihna a ni a, De Lorenzo tan hna a hautak dawn. Napoli defender Di Lorenzo hian starting eleven chang turin inelna ṭantirha bul ṭantu Alessandro Florenzi nek chhuak thei mah se Manchester City forward Sterling dah ṭhat a har dawn.

Sterling thlawp thei tur hian Luke Shaw a la awm bawk a, Manchester United left back hi England goal nawrna ber pakhat a nih avangin Roberto Mancini-a'n Di Lorenzo thlawptu tur player a thlan thiam a ṭul dawn a ni.

Emerson & Insigne vs Saka & Walker
Leonardo Spinazzola inhliam lo se England tlarhnungin Italian wing back an ven dan tur chu thil hriat châkawm zinga mi a ni. Amaherawhchu Spinazzola awm loh hnuah pawh Lorenzo Insigne a la awm miau avangin Italy hi mual vei lam aṭanga an nawr a la hlauhawm zel.

Spain lakah khan Insigne leh Emerson te inkawp hmang hian Italy hian ṭum thum chance ṭha an nei a, Southgate-a hote tan ven uluk a ṭul dawn. Mawhphurhna chelhtu tur chu Germany wing back Robin Gosens leh Denmark wing back Joakim Maehle lo dah ṭha tawhtu Bukayo Saka a ni thei ang a, Arsenal rawlthar duhawm hian Kyle Walker thlawpna a mamawh ang. Three Lions hian mual vei lam aṭanga Italy goal nawr an dan chah theih chuan hna harsa zualpui chu an zoah a ngaih theih ang.

Mual lai inbeihna
Italy-in ball sem thiam Jorginho an kawl a, Chelsea midfielder thlawp tur hian Marco Verratti leh Nicolo Barella te an awm. Azzuri tlarhnung a ṭhat avangin midfielder-ten huaisen takin goal an nawr thei a, ball an thiam vek bawk avangin an chevel a hmuhnawm hle.

England lamin Mason Mount, Kalvin Phillips leh Declan Rice te an kawl thung a, midfielder pathum hian Premier League lamah Jorginho theihna an hrechiang vek tawh a, mual laia inbeihna hi a hmuhnawm dawn.

Maguire & Stones vs Italian trio
World Cup 2018-ah khan Harry Maguire leh John Stones te hi an inkawp rem tawh a, kum thum a ral leh tawh avangin player pahnih hi an inhrechiang tawh hle. Mual sira centre back-te thlawptu Shaw leh Walker te hi club lama an khelhpui ve ve te an ni a, England-in goal khat chiah an la chhuah hi a mak hran lo.

Amaherawhchu England tlarhnung su hawng turin Ciro Immobile, Insigne leh Federico Chiesa te an awm dawn a, player pathum hian goal hnih ṭheuh an khung tawh a, chumi zawmzia chu kil tin aṭangin goal a lut thei tihna a ni.

Bench a chhah
England tana bul ṭan tur a la chiang lo a, semifinal angin bul ṭan nawn ta se, bench aṭanga lut turin player ṭha an la kawl nual a, starting eleven-a lut awm tak vek an ni.

Goal an khung hma a nih chuan tlarhnung tichak turin Jordan Henderson an dah lut thei a, defence lai ni se inelna ṭantirh lama bul ṭantu Tyrone Mings a awm a, La Liga-a Atletico champion puitu Kieran Trippier hi mual ding leh veia a khel theih bakah Chelsea wing back Reece James leh Ben Chillwell te an la awm cheu.

Goal an chhuah a nih pawhin goal nawr turin Jack Grealish, Phil Foden, Marcus Rashford, Jadon Sancho, Jude Bellingham leh Dominic Calvert-Lewin te an awm. Thil chiang erawh a lut vek dawn lo.

Italy pawhin an khelh dan 4-3-3 hre bel hlir bench-ah an kawl a, tun inelnaah keeper Alex Meret chiah chu la inlan lo a ni. Defence laia ding thei tur Francesco Acerbi leh Alessandro Bastoni te hi rin ngam an ni a, Spinazzola awm tawh lo mah se Emerson an kawl a, Chelsea defender thlakna tur hian Rafael Toloi a la awm. Di Lorenzo thlakna turin Florenzi a la awm lehzel.

Midfield-ah ni se set thar hlaka thlak thei tur an awm a, Manuel Locatelli, Matteo Pessina, Bryan Cristante leh Gaetano Castrovilli te chu chhawrtlak vek an ni. Forward lam pawh set thar an awm thei a; Domenico Berardi, Federico Bernardeschi, Andrea Belotti leh Giacomo Raspadori te chu engtik hun pawha lut thei turin an inpeih ang.

Player, captain, fan leh pundit ang tein England tan hun duhawm tak tak ka lo tawng ve tawh a, Wembley Stadium-a European Championship final khelh tur hi a lian ber. Kum 50 mi ka ni tawh a, ram tan mipa inelna final hi ka la tawng ngai lo. England team chungah hian rinna nghah chhan tam tak ka nei a, chumi zinga pawimawh ber chu Gareth Southgate hi a ni. Gareth-a hna hautak turzia hi kan hrethiam em? England manager a nih avangin mipui maktaduai 60 chuan a chungah beiseina an nghat a ni.
- Alan Shearer

England-in Euro 96 semifinal an thlen ṭumin Alan Shearer hi player pawimawh a ni a, English mipui beiseina an tihlawhtling zo lo. England football team hla 'Three Lions (Football's Coming Home) tihah chuan kum 30 chhung na tuar tawh thu a awm a, tunah erawh kum 30 mai ni loin kum 55 a tling leh tawh. Booby Moore te hoa an chawi Jules Rimet trophy la tle reng mah se an rilru na thawi damna an zawng a, nomawi an la beisei reng. Pathianni zanah an hun a inherchhuah an beisei dawn a ni.