Zarkawt BCA hneh kan tum - Vikings coach

Mizoram Super League season 6 hmahruaitu leh team ṭha bera chhal ngam ni bawk Zarkawt BCA leh Chanmari Vikings te zanin dar 6:30 hian an inhmachhawn dawn a, Vikings coach H. Lalhruaitluanga chuan champion team hneh ngei an tum thu a sawi.

BCA hian tun season match li an khelh tawhah hnehna an chang vek a, point riat hmuin a chung berah an awm - semifinal an lut chiang tawh. Vikings hi vawi khat an chak loh hnuah tho chhuak leh niin palina an ni mek thung.

Chak kan tum

Team thar ni mah se Chanmari Vikings player leh coach hi MSL-ah an mikhual lo. Vikings coach Hruaia chuan, "Khatla TBL hneh loin inelna bul kan ṭan a, tun hnai kan match hnuhnung pahnihah erawh a zawnin kan chak, kan phur vanglai tak a ni.

"Zanin hian kan ṭhat dan bera khelh kan tum a, team ṭha hmachhawn tur kan ni tih kan hria, chak ngei kan tum avangin theih tawp kan chhuah ang," tiin Vanglaini a hrilh. BCA bakah hian league match hnuhnung ber atan Tuikual South an la hmachhawn leh ang.

Zarkawt BCA coach Lalruatfela chuan, "A sang bera awm kan duh," tiin MSL6 khelh ṭan tirh khan a sawi tawh a, coach Afela thu sawi aṭangin semifinal lut chiang tawh mah se Chanmari Vikings lakah theihtawp an chhuah dawn tih a hriat theih.

League round a sang ber nih a hlu a, champion lai BCA hi an chak lo a nih chuan Vikings ngei pawh hi a chung bera la awm daih thei an ni. Semifinal lama khingpui nem zawk deuh hmachhawn an duh a nih chuan team pahnih tan zanina hnehna chan a pawimawh.

Coronavirus vanga buaina chuan tualchhung infiamna pawh a nghawng, Mizoramah a hri kai hmuh la ni lo mah se fimkhur thu hlaah Mizoram State Sports Council chuan tournament neih lai ho chu entu nei loa khel turin a ti. Mizoram Super League Season 6 kal lai pawh zanin aṭang hian entu nei loa khelh a ni dawn. A hmunah en theih ni lo mah se Zonet HD, Zonet Rihnim leh Zonet YouTube lamah live-a pek chhuah a ni ang. MSL khelhna hmunah hian official, player, coaching staff leh follower bakah MSLBoard-in phakna a pekte chiah an lut thei dawn a ni.