India inkhelh hun sawn

Asia khawmualpuia football thuneitu sang ber Asian Football Confederation (AFC) chuan 2022 World Cup leh 2023 AFC Asian Cup round 2 qualifier inkawp, March leh June-a khelh hmabak awm chu coronavirus vanga a khelh hun sawn a nih thu an sawi. 

AFC thu chhuak avang hian India pawhin March leh June-a match khelh tur a neih chu a khel thei rih dawn lo niin a lang. Ruahmanna hmasa ang chuan India hi March 26-a Qatar mikhual turin a inbuatsaih a, inkhelhna tur hmun atan Bhubaneswar khawpuia Kalinga Stadium thlan fel a ni tawh bawk. 

Blue Tigers hi June 4-a Bangladesh-a zin tura tih an ni bawk a, June 9-ah Kolkata khawpuia Afghanistan thleng tura beisei an ni bawk - mahse AFC thupuan anga an kaltlang dawn a nih chuan heng match ho hi India chuan a khel rih dawn lo tihna a ni. AFC chuan match-a inhnamhnawih zawng zawng te himna tur inkhelh thlengtu turin an ruahman thei a nih chuan match hi kaltlangpui theih a nih thu an sawi a, he thu buatsaih thleng hian AIFF lamin ngaihdan an la sawi lo thung.