NorthEast Derby-ah Aizawl FC chak lo

Mizo club Aizawl FC-in tun season I League-ah NorthEast Derby vawi hnih an hmachhawn tawh a, an chak lo ve ve. Point ruk an hlohna hmun hi season liam taa ngam loh an tawn lohna hmun tho Rajiv Gandhi Stadium, Mualpui a ni.

Inrinni inkhelah Aizawl FC-in Nigerian defender Kareem Omolaja hmangin first half-ah hma hruai mah se, Neroca-in second half-ah Odili Felix Chidi leh Nedo Turkovic te goal hmangin an lehthal. Mizo club hian Manipur club an hneh loh hma hian Shillong Lajong lakah an chak lo tawh bawk.

Bul ṭan ṭha AFC
Aizawl FC-in hliam vangin midfielder pawimawh David Lalrinmuana an la chhawr thei lo a, hrem vangin Masih Saigha­ni an hmang thei lo bawk.

He ti chung hian Mizo club-in Manipur club an ngam nghal. Andre Ionescu chuan Neroca keeper Shambhu Mistry tan hna a siam nghal a, Romanian midfielder Andre hian freekick aṭangin crossbar a pet per bawk a, a vanneih ni a ni lo.

Neroca first keeper Lalit Thapa inhliam vanga lut Mistry chu Manipur club chhantu a ni a, Japanese midfielder Yugo Kobayashi goal khung tur a dan sak pawh ṭha tak a ni.

Minute 39-naah Andre corner pet chu Kareem-a'n a khung a, Nigerian defender hi a inhliam zui nghal avangin Aizawl FC-in loh theih loin subsitution an siam phah a, Mizo tlangval Hmingthanmawia (Valpuia) chu luhtir a ni.

Aizawl FC tlarhnung a nghing zui a, first half tawp hma hretin Neroca captain Subash Singh-a'n chance ṭha a nei a, goal-ah a chantir thei lo.

Tactical Battle
Aizawl FC-in tlarhnunga an rinrawl pahnih Masih leh Kareem te an chan a, Rosanga leh Valpuia te chu a vawi khat nan an inkawp. Portuguese coach Paulo Meneses-a'n half­time hmangin insiamṭhatna hun ṭha a nei a, amaherawhchu Neroca coach Gift Raikhan-a'n a khingpui chak lohna lai a hmuh fuh avangin a hmang ṭangkai zawk.

AFC coach Paulo-a'n Ro­sanga leh Valpuia thlawp turin Liberian midfielder Alfred Kemah Jaryan aiah attacking player anga hriat lar zawk K. Lalṭhathanga a hmang zui a, Neroca boss Gift erawhin ball pet thiam David Lalbiakzara luhtirin striker palian feet ruk leh inches thuma sang Nedo Turkovic a luhtir tawh bawk.

Mizo club-in goal khung belh an tum a, Neroca lamin goal an chhuah tawh avangin an nawr ngam tawh a, defender vawm nâ Ngasepam Tondonba an hmang ṭangkai hle.

AFC-in an khingpui an ngam luat an tuar a, Albert Zohmingmawia hmanga counter attack-na chu a hlawhchham avangin Nercoa-in an vaw let a, tawnhriat nei tlem AFC tlarhnung chiang taka an ṭhiah hnuah Odili Felix Chidi-a'n an si phurh a sût.

Mahni mualah Aizawl FC an buai a, an vanduai tel bawk. An tumah Neroca an chiang a, minute 85-naah vei lam aṭanga Biakzara cross chu Turkovic-a'n chakna goal khung nan a tauh lut.

Goal luh hma hian Paulo-a'n chak tum vangin left back Lalramhmunmawia la chhuakin Puitea a pawt let a, Portuguese coach thutluknain a ṭha lo zawngin nghawng a nei.

Mizo club erawhin point hmuh an phu a, Yugo Kobayashi chu box chhungah tihtluk a ni chungin penalty pek a ni lo. Japanese forward hian chance ṭha ṭum hnih dang a hlah a, substitute Khawpuimawia'n a tauh fuh tawk loh avangin Neroca keeper Mistry-a'n a dang hman a, Alfred-a goal khung tur chu a teammate William Lalnun­fela'n a dan sak!

Fak phu Neroca
Neroca ṭantu 50 bawr velin NorthEast Derby en turin Manipur aṭangin bus hmangin Aizawl an rawn zin a, an team chet chhiat lai ber pawhin thawm an nei a, RG Stadium-ah AFC ṭantu aiin thawm an nei ring zawk fo a, beiseina siamtu an ni - Aizawl FC fans aiin an au rual thiam zawk!

Man of the match-a thlan Odili Felix Chidi pawhin, "Manipur aṭangin an rawn zin a, an inpekna ka hmuh khan goal khung ka bat a ni. Goal ka tiam a, ka khung sak thei kha ka lawm hle a ni," tiin mipui vanga a phur thu a sawi.

Neroca coach Gift Raikhan chuan, "Manipur leh Mizoram hi unau kan ni a, kan chak pawhin uchuak takin kan lawm tur a ni lo tih ka player-te leh fan-te ka hrilh a, ka khap daihna chhan pawh a ni. Kareem-a inhliam kha kan vanneihpui a, AFC an vanduai a ni," tiin a inhrosa duh lo.

Chhuanlamah inhliam
AFC coach Paulo Meneses chuan, "Masih leh Kareem-te hi kan team-ah chuan player satliah an ni lo a, player ṭha bik an nih avangin thlak an harsa. Chutiang thoin David-a pawh kan midfielder zingah chuan thlak a harsa hle. An tel loh chuan ṭha taka khelh a har a, kan chak loh chhan pawh a ni," tiin an player pawimawh inhliam an tawrh thu a sawi.

Portuguese coach Meneses chuan match khelh tur a la tam avangin champion beiseina a la awm thu a sawi a, Aizawl FC hian January 25 hian Mohun Bagan an mikhual ang.