Record siam inbeisei Pep

Manchester City manager Pep Guardiola chuan Inrinni zana 3-1 a Newcastle United an hneh hnuah Premier League chanchina point hlawh chhuak hnem ber ni chunga season khar an tum thu a sawi - Magpies lakah hian Sergio Aguero chuan hattrick a siam a, mikhual team tan Jacob Murphy chuan goal khat khung mah se awmzia a nei thui lo.

City tan Aguero-a'n hattrick siam tur hian penalty a khung tel a, he penalty hi tun season-a che ṭha tak Raheem Sterling hlawhchhuah a ni - Aguero-a'n hattrick a siam chiah khan City tana hattrick a siam vawi 11-na a ni a, tun season-a goal thum vawi hnih a khungna a ni chiah bawk.

Guardiola chuan, "Champion turin match 10 chak chiah kan mamawh tawh a, point tam zawk hlawhchhuah tumin kan bei zel ang. Ka naute an khel ṭha takzet a, Magpies khan vawi khat chiah an rawn paltlang ve a, vannei takin goal-ah an chantir zui a ni," tiin goal khat khung Magpies chu an vanneih thu a sawi.

City hian Magpies an hneh hma hian khualmualah Liverpool chu 4-3 in an ngam lo a, Pep chuan an tlawm hnu lawka hnehna an chang leh thei nghal chu a lawm thu a sawi. Spanish manager chuan, "Kan match hnuhnung bera point kan hloh hnuah khatiang tak khan kan khel thei a, ka hlim takzet a ni," a ti.

Pep chuan sawi chhunzawmin, "Goal khung zat hi a pawimawh ber lo a, chance kan siam zat leh kan keeper-in a dan zat te hi a pawimawh lai chu a ni. Ka lawmna ber chu 2-1 a nih hnua hlauthawng miah loa kan khel thei kha a ni," tiin a sawi.