AIFF leh MFA-in Baby League chungchang zirho

All India Football Federation leh Mizoram Football Association buatsaihin R. Dengṭhuama Hall, Mualpuiah January 20, Inrinni khan naupang football zirna kalphung thar tur, Baby League zirna workshop buatsaih a ni.

AIFF aṭangin chief operating officer Kishore Taid leh head of players development Richard Hood ten zirtirna an pe a, FIFA South Asia Development manager Prince Rufus pawhin Baby League chungchanga FIFA ngaihdan leh ṭanpuina pek theih dante a sawi.

He workshop-ah hian MFA, District FA, SSA Grassroots, Tata Trusts MPL Club aiawhte bakah Football coach te an tel a ni.

AIFF aiawhte chuan, India ramah kan kalphung pangngai hi hun rei tak kan lo kalpui tawh a, tihdan kan thlak loh chuan tuna result ang tho hi kan nei leh thin ang. Chuvangin naupang atanga football zir dan thar neih a ṭul tawh, tiin an sawi.

Naupang chu kum 6 vel aṭanga football khelhtir a, inkhel tak tak anga an khelh theihna turin Baby League siam a ṭul thu an sawi.

AIFF aiawhte chuan nau­pangte tan futsal pawh kalpui turin MFA chu thurawn an pe a, footballer than chhoh zelnaah futsal khel thangten midang thiam loh thil tam tak an thiam thu te an sawi.

AIFF leh FIFA lamin Mizo­rama Baby League bul ṭanna tura tanpuina an pek theih dante sawi lan a ni bawk.