Nadal-a'n quarterfinal a lut

World number 1 Rafael Nadal chuan Diego Schwartzman hnehin Australian Open quarterfinal a lut. Roger Federer leh Novak Djokovic te pawhin last 16 an inhlangkai tawh bawk a ni.

Seeded pakhatna Nadal hian nimin khan Rod Laver Arena-ah Argentina tlangval hi 6-3, 6-7 (4-7), 6-3, 6-3 in a hneh, semifinal lut tur chuan Thawhlehni zingah Marin Cilic a paltlang leh a ngai ang.

Kum 31 mi Nadal chuan, "Schwartzman kha player ṭha tak a ni a, kan inkhelh chhung zawng khan hna hautak min siamsak reng a ni, kumina ka match khelh tawh zingah a la hautak ber," tiin a sawi.

Inrinni inkhelah champion lai Federer chuan Richard Gasquet chu 6-2, 7-5, 6-4 in a hneh a, kum 36 mi Federer-a'n French tlangval lakah vawi 17 hnehna a channa chiah niin vawi hnih a hneh lo tawh thung. Vawiin chawhma lamah world number 80 Marton Fucsovics a hmachhawn leh dawn a ni.

Australian Open vawi ruk champion tawh Djokovic-a'n Albert Ramos-Vinolas chu 6-2, 6-3, 6-3 in a hneh ve bawk. Serbian tlangval Djokovic hi a kiu na vangin season hmasa chawhnu lam kha a inkhel thei lo a, Wimbledon hnuah tun ṭum hi Grand Slam a khelh lehna hmasa ber a ni.

Grand Slam vawi 12 champion tawh Djokovic hian vawiinah Hyeon Chung a hmachhawn leh dawn. South Korean tlangval Chung-a hian rawlthar beisei awm Alexander Zverev chu 5-7, 7-6 (7-3), 2-6, 6-3, 6-0 in a hneh - Djokovic tan fimkhur a finthlak ang.