Sanchez leh Mkhitaryan inthleng dawn
Manchester United midfielder Henrikh Mkhitaryan chuan Arsenal a zawm dawn, Gunners forward Alexis Sanchez-a'n Old Trafford a pan thung ang–player pahnih te nian nimin khan medical test an nei a, hun rei lote chhungin an transfer hi a fel chho hman tura ngaih a ni.
Inrinni zan khan Arsenal hian an mikhual Crystal Palace chu 4-1 in an sawp a, he inkhelah hian season hmasa club top scorer Sanchez hmel hmuh tur a awm lo. Chile international hi Manchester lamah transfer thil vangin a kal.
Palace an hneh hnuah Arsene Wenger chuan, "Kan kalna kawng a inan loh chuan chhawr theih a ni lo," tiin Sanchez zin thu a sawi a, United manager Jose Mourinho pawhin si khat faia Burnley an hneh hnuah Barcelona forward hlui hi an lakluh hnaih tawh thu a sawi bawk.
Manchester United hian Anthony Martial-a goal khat hmangin Burnley 1-0 in an hneh a, match 24 khelhah point 53 an hmu a, pahnihna an ni. United hi Premier League hmahruaitu Manchester City aiin point 12 in an hniam zawk a, Arsenal erawh paruknaah an la awm thung.
Manchester United manager Mourinho-a'n season tir lamah Mkhitaryan chhawr rim viau mah se tun hnaiah a khelhtir ngai lo. Borussia Dortmund midfielder hlui hian United tan match 63 a khelhah goal 13 a khung thei, tunah chuan Bundesliga club a chhuahsan dawna a hnawl tak Arsenal tan a khel dawn ta thung a ni.
Sanchez tel loin
Premier League match thum chhung chak ni hmel an hmuh zawh loh hnuah Arsenal hian Nacho Monreal, Alex Iwobi, Laurent Koscielny leh Alexandre Lacazette te goal hmangin Palace an hneh, goal pali hi inkhel tir lam minute 22 chhunga an khung vek a ni.
Emirates Stadium-ah Sanchez awm lo mah se, playermaker Mesut Ozil leh Jack Wilshere ten hnehsawh taka midfield an thunun theih avangin Gunners tan goal khung kawngah buaina tur a awm lo.
Germany international Ozil-a khup hliam a dam tawh, Janaury 3 hnua a vawi khat nan inkhel bul a ṭan. Arsenal goal nawrna thapui a ni a, striker Lacazette-a'n goal a khung theih nan ball vawi nga a khawih hnuah ṭha zetin a pe a ni–Palace lakah hian vawi 56 pass a nei a, heng zinga 51 chu an khingpui goal lamah a ni.
Arsenal manager Arsene Wenger chuan, "First half chhung khan Arsenal nihna dik tak kan lantir a, second half-ah erawh kan chhunzawm thei lo. Minute 45 chhung kha chu min ṭantuten an duhthusam football an hmuh ka beisei," tiin a sawi.
Martial a goal
Turf Moor-a inkhelah mahni goal ven thiam Burnley chu ni dang ang bawkin an
ṭang khawng thei hle. Minute 54-naah striker palian Romelu Lukaku thawhrah sengin Martial-a'n chiang zetin goal awmchhun a khung, United hian goal zawnah vawi hnih chiah pet thei mah se pakhat zawk a luh avangin an mamawh point thum an hmu.
Man United hian tun hnai an league match hnuhnung pariatah hneh loh an tawng lo a, an elpui City angin goal khung pur pur lem lo mah se point thum an hmuh avangin Pep Guardiola naute kal fawr lutuk tur an um ve zel.
Manchester United manager Jose Mourinho chuan, "Mike Dean-a naute kha team ṭha tak an ni a, hmachhawn an harsa hle," a ti. Chelsea manager hlui hian tun hnaia Anthony Martial khel ṭha chuan a tih lawm thu leh ngelnghet taka khel ṭha tura a duh thu a sawi tel bawk.