Kolkata-ah Bagan an lian ber

Nimin tlaia Kolkata derby inkhelah East Bengal an mualpho a, an hmelma kumhlun Mohun Bagan lakah 2-0 in an tlawm. Bagan tan tun hnaia Kolkata club-in chhuahtir an tum anga an sawi Aser Dipanda Dicka chuan Bagan-a khelh zel a la phu a ni tih pholangin goal hnih a khung a, East Bengal-in a chhanletna tur an nei thei lo.

Salt Lake Stadium-a inkhelah Dicka hian minute khatna lekah goal hmahruai a khung nghal a, minute 35-naa a goal hnihna hi mawi taka a volley luh a ni–East Bengal defender ten Cameroonian striker hi an veng uluk tawk lo a, corner aṭanga ball kalah duh thala chetna hmun awl an pe.

East Bengal coach Khalid Jamil-a'n rin loh takin Laldanmawia Ralte leh Brandon VL Remdika te a chhawr lo a, an game siamtu ber Mahmoud Al Amna chu minute lina lekah hliam vanga lakchhuah a ngaih bawk si avangin East Bengal hi an talbuaiah a ngaih theih–hun tawp thlengin inkhel thununtu chu Bagan an ni a, Nikhil Kadam-a'n hun pek belha post a pet per hlauh chu Khalid-a leh a naute mualpho zualpuina laka chhanhimtu a ni.

Lalramchullova'n East Bengal tan inkhel bul a ṭan a, Mohun Bagan defender Ricky Lallawmawma'n inkhel bul ṭanin derby boruak sangah a khel ṭha hle–Bagan hi Ninganiah Aizawl FC nen RG Stadium-ah an inkhel ang.