Costa leh Griezmann la chhuaktu Atletico chak zo lo

Spanish La Liga lamah rin loh result hmuh tur a awm zel a, Atletico Madrid chuan Inrinni zan khan an mikhual Girona chu goal khat ve ve khungin an inhnehtawkpui–Atletico tana thu hriat nuam tur erawh an hnuai chiaha awm Valencia-in hnehna an chang zo bik lo a, Las Palmas lakah 2-1 in an tlawm.

Atletico coach Diego Simeone chu inkhelh zawha sawisel hlawh a ni. Argentine manager hian 1-0 leka hma an hruai laiin tlarhma lama a player neih hriam pahnih Diego Costa leh Antoine Griezmann a la chhuak a, player pahnih lakchhuah an nih hnuah goal an chhuah avangin an chak zo lo.

Thutlukna dik lo?
Inkhel ṭantir aṭangin Atletico Madrid-in inkhel an thunun nghal a, Griezmann leh Angel Correa te inkawp chu Girona tan buaipui tham an ni. Griezmann-a'n a chance neih a chhawr theih loh reng hnu minute 34-naah erawh a tisual nawn tawh lo a, Atletico hmahruaina goal ṭha zetin a khung–Girona tlarhnung an hawihai.

Chawlhlawk hman zawh a nih hnuah team pahnih an la inbuk tawk viaua a lan laiin Simeone-a'n thutlukna mak a siam a, rin loh takin Griezmann leh Costa a la chhuak–player pahnih lakchhuah an nih hnuah Atletico hlauhawmna a nep sawt a, minute 73-naah Portu chuan an si phurh sutna goal khungin Atletico-in goal dang an nei thei tawh lo.

Simeone a ṭang
Point thum hlawhna tur nia ngaihah Atletico-in point khat chiah an hlawh chhuak a, a tawpa dem rawn hlawh ber chu substitution beisei loh siamtu Diego Simeone a ni. Mahse, Argentine manager chuan a thutlukna chungchang sawiin, "Costa khan hliam tenau a nei a, minute tam vak lo a khel lui chung khan a ti thei ngang lo a, amah khan lakchhuah a duh a ni," a ti.

Simeone chuan sawi zawmin, "Griezmann khan a khel ṭha em em a, Correa leh Costa nen khan an inman em em a ni," tiin goal khungtu a fak a, a lakchhuah chhan erawh a sawi lo. Kum 47 mi manager chuan, "Game ṭha tak kan khel a, inkhel kha kan thunun em em. An goal kha chu vanneih goal a ni ber a, hei hi football a thil thleng ṭhin chu a ni. Team ṭha zawk kan ni a, point khat hlawh chhuak ni loin point hnih hloh zawk kan ni," tiin a sawi.

Griezmann a nghing?
Tun hnaia transfer bazar inhawn apianga hming ri ring pawl ni ziah chu Griezmann a ni–French forward hi Barcelona nen sawi zawm mek an ni a, Girona nena an inkhelah a khelh ṭhat laia lakchhuah a nih bawk avangin a chhuak dawn nia sawi thawm a ri ring leh tawh hle.

Barcelona coach Ernesto Valverde chuan hemi chungchanga thuthar thehdarhtute zawhna chhangin, "Griezmann hi club dang player a ni a, a khelhna club Atletico Madrid ka zah avangin a chungchang ka sawi thei lo. Transfer bazar lun lai a nih avangin thuthar hrang hrang a awm reng a, club chu kan dinna ngaiah kan ding reng. Griezmann hi player ṭha a ni tih ka pawm a, mah se ka player-te hi player ṭha ber chu a ni," tiin thuchiang a sawi duh lo.