Sharapova lakah Kerber a chungnung

Australian Open champion tura rinkai ni phak pahnih Maria Sharapova leh Angelique Kerber te Inrinni khan an intawng a, German nula Kerber hian darkar khat leh minute ruk chhungin 6-1, 6-3 a hnehna changin last 16 a lut.

World number 1 hlui Kerber hian tun hnaiah a khel ṭha hle, Australian Open-ah hian game 13 chiah a la hloh a, match thumah set a la hloh lo. Sharapova erawh hremna a hman zawh hnuah khel ṭha chho viau mah se tun hma angin a hlauhawm thei rih lo.

Hnehna a chan hnuah Kerber chuan, "Set hmasa kan khelh zawh hnu kha chuan hahdam takin khelh chhunzawm ka tum a, ka service leh ball vuak a dik thei hle a, hnehna ka chan theih nana pawimawh tak pakhat chu tihsual ka nei tlem kha a ni," tiin a sawi.

Kerber hian 2016 khan Australian Open leh US Open nomawi a chawi a, a tan kum ṭha leh chhinchhiah tlak a ni. Season hmasa khan beisei a phak lo a, tun season-ah erawh match 12 khel tawhin hnehna a la chang fai vek–kum hnih liam ta lama a chetṭhat ang kha a tawng leh a nih pawhin a mak lo ang.

Russian nula Sharapova hi kum hnih liam ta khan Melbourne-ah hian a inlan a, hemi hnuah tum ṭum hi a inkhelh lehna hmasa ber a ni. Sharapova hian a match hmasa set hloh loin kal thei mah se tharum ngah Kerber lakah a talbuai hle, tihsual a ngah a, a khingpui ball vuak chu ṭha takin a vaw let hleithei lo a ni.

Grand Slam vawi nga champion tawh Sharapova chuan, "Hmasawnna tur tam tak ka la nei, tun ṭuma ka thil tawn hi ka tan inzirna ṭha tak a nih ngei ka beisei. Kerber khan a khel ṭha em em a, tun hma zawng aiin a ṭha tawh zawk a ni," tiin a sawi.

Wozniacki a tlang
Australian Open khelh mekah world number 2 Caroline Wozniacki chuan seeded 20-na Magdalena Rybarikova hnehin quarterfinal a lut. Kum 27 mi Wozniacki hian darkar khat leh minute thum chhungin 6-3, 6-0 in hnehna a chang, game hnuhnung 12 zinga 11 zet laiin chak turin buaina a tawk lo.

Wozniacki hian quarterfinal-ah chuan Carla Suarez Navarro a hmachhawn leh dawn. Spain nula Suarez Navarro hian last 16 inkhel dangah Anett Kontaveit chu 4-6, 6-4, 8-6 in a hneh ve bawk a ni.