Wembley Stadium pan tur Man City?

Manchester City-in zanin dar 1:15 hian Ashton Gate-ah Bristol City an tlawh dawn a, Carabao Cup final khel tur zawnnaah hian Premier League club hian first leg-ah 2-1 in hnehna an chang a, Championship club tan thawhchhuah a har dawn.

Pep Guardiola chuan Manchester City hian ropuina kawng zawh turin nomawi an mamawh thu a sawi tawh a, League Cup final thlen a harsa lo a nih pawhin nomawi chawi tur chuan an hmaah Arsenal emaw Chelsea an la awm dawn avangin a la awlsam lo. Naktuk zan hian Gunners leh Blues ten semifinal second leg an khel dawn a, Stamford Bridge-ah goal lut loin an ṭin tawh a, Emirates Stadium-a inkhel tur hian ngaihven a hlawh ang.

Goal khat chauh
Kawng tinrengah Man City buk a rit zawk nachungin Etihad Stadium-a an inkhelh tawhna aṭanga teh chuan Premier League club hi chesual thei an ni. Pep Guardiola hote hi an mualah hun tawp dawna Sergio Aguero goal hmangin 2-1 in a chak hram a, Robins hian Bobby Reid hmangin goal an khung hmasa a, City hian Kevin De Bruyne hmanga an sut hnuah Argentine striker hian chakna goal a khung.

Pep-a leh Lee Johnson-a te player neih dan a inthlau a, tun dinhmunah erawh an inkarah goal khat chauh a awm. Robins hian an khelmual Ashton Gate-ah hun duhawm bik an tawng tawh a, helai hmunah hian Premier League history-a sulhnu nei ṭha ber Manchester United an tlawm tawh a, Man City an mikhual hunah pawh infuih nan an hmang nawn leh ang.

Diedhiou a dam
Bristol club history-a player manto ber chu Famara Diedhiou a ni a, pound maktaduai 5.3 man chauh a ni. Nipui laia Ligue 1 club Angers aṭanga Championship club zawmtu Senegalese forward hi club pahnih inthlauh zia lantirtu a ni a, hetiang zat man tan City-ah hmun a awm lo.

Chutihrualin Diedhiou hi Bristol tan erawh phurna tham a ni a, nikum October thlaa a inhliam hnuah kartawpa Derby County an hmachhawn ṭumin a rawn kir a, Premier League club a hmachhawn thei dawn. Championship club tana chanchin lawmawm lo erawh an keeper Frank Fielding leh defender Nathan Baker te chu inhliam vangin second half-ah an khel lo.

Robins boss Lee Johnson chuan, "Frankie hi a ṭha turah kan ngai a, Nathan hi kan player pawimawh a nih avangin a dam a ṭul a ni," tiin Man City an hmachhawn theih a beisei thu a sawi.

Kompany hoin
City boss Pep Guardiola-a'n fixture hmabak hre chungin player a siksawi a rinawm a, Belgian defender Vincent Kompany pawh match fitness nei turin a inlan a rinawm. Hetihlai hian Premier League club tan Fabian Delph (khup), Phil Foden (ngalrek), Gabriel Jesus (khup) leh Benjamin Mendy (khup) te an la inlan thei dawn lo a, an squad a chhah avangin buaina tur erawh an nei lo.

Man City hian Liverpool laka an chak loh hnuin Newcastle lakah an tho chhuak lehnghal a, an hmelma Manchester United lakah an lak tum Alexis Sanchez chan mah se chanchin lawmawm hriat tur an ngah zawk. Tlarhnunga an defender pawimawh Nicolas Otamendi chuan kum 2022 thleng daih turin a contract neih sa a pawtsei a, an chakna hnar De Bruyne pawhin a contract neih lai a pawtsei hnai bawk.

Sergio Aguero pawhin a elpui Brazilian forward Jesus awm loh hlanin goal hmangin a dinhmun a sawhnghet a, Argentine striker hi Bristol laka chakna goal khungtu a ni ringawt lo a, match hnuhnung bera hattrick siamtu a nih avangin Bristol-in an ven uluk a ṭul ang.

Pep Guardiola hian hmathlir thui tak a nei a, kum lama naupang la khawmin team ṭha tak a din a, nomawi an chawi theih chuan heng player-te hian inrintawkna an ngah lehzual ang.

Penalty Shootout?
League Cup semifinal-ah hian away goal rule dan awm mah se inelna dang nen an hman dan a dang hret. Minute 90 an khelh zawhah an goal khung zat a inan hrim hrim chuan extra time khelh tur a ni a, minute 30 dang an khelh zawhah chiah away goal rule hman tur a ni.

Bristol hian minute 90 chhunga 1-0 a City an hneh chuan extra time khelh a ṭul dawn tihna a ni a, minute 30 dang an khelh hnua goal a luh belh loh chuan Championship club hi away goal rule hmangin an chak ang. Penalty shootout thleng tur chuan extra time khelh zawhah Bristol hi 2-1 in an chak a ṭul dawn a ni.