England captain hlui Jimmy Armfield a thi

Blackpool legend Jimmy Armfield chu nimin khan cancer natna avangin a thi a, kum 82 mi a ni - Armfield hian a vanglaiin England tan match 43 a khel a, heng zinga match 15-ah hian captain armband hreng chungin ram tan a inlan a ni.

Denton, Greater Manchester khawchhuak defender hian player a nih laiin a hun zawng zawng chu Blackpool-ah a hmang zo vek a, match 627 inlan sakin club tana inlan hnem ber record chelhtu niin tun thlengin he record khum thei hi an la awm lo.

May 1, 1971 khan kum 35 mi niin professional footballer nichunga a match hnuhnung ber chu a khel a, inkhel a chawlhsan hnuah coaching lam luhchilhin Bolton Wanderers leh Leeds United a enkawl.

Bolton hi a season hmasa berah third division champion nihpuiin second division a inhlankaipui a, 1971-74 inkar a enkawl. Kum 1974-78 inkarah Leeds United enkawl lehin a season hmasa berah hian European Cup final a khelhpui nghal. Kum 1978 hnuah erawh coaching lam chawlhsanin sports journalism a luhchilh a, Daily Express tana a thawh hnuah BBC Radio 5 Live-ah kum 30 chuang commentator hna a thawk.