Australia Open-ah Novak Djokovic a tla

Vawi ruk a champion tawhna hmun Australian Open last 16

aṭangin Novak Djokovic chu vuak tlak a ni. Nimin tlai khan Rod Laver Arena-ah Serbian tlangval hi world number 58 Hyeon Chung lakah 6-7 (4-7), 5-7, 6-7 (3-7) in a tlawm. Chung-a hi Korean tlangval zingah Grand Slam quarterfinal lut thei hmasa ber a ni.

Grand Slam vawi 12 champion tawh Djokovic hi season hmasa aṭang khan hliamin a tibuai a, nikum khan Wimbledon hnu lamah a inkhel zui thei tawh lo. Kumina Grand Slam hmasa ber a khelh hma hian tournament a hmachhawn lo a, inelna liana a thlen san loh chhan hi mimal tihsual (unforced errors) a ngah vang a ni.

Roger a tlo
Champion lai Roger Federer-a'n Australian Open quarterfinal lut ruin harsatna an la tawk lo. World number 2 Federer hian nimin khan Marton Fucsovics hnehin last 16 a paltlang.

Rod Laver Arena-a inkhelah Federer hian world number 80 Fucsovics hi 6-4, 7-6 (7-3), 6-2 in a hneh. Swiss thiampuipa hian tun season chhunga a vawi khat nan chhunah match a khel a, darkar hnih leh minute khat chhungin hnehna a chang. Kumin bik hian Melbourne Park-ah set hloh loina la kaltluang thei a ni.

Australian Open vawi nga champion tawh Federer hian quarterfinal vawi 14 a luhna chiah a ni a, hard court inelna lianah hian sulhnu nei ṭha berte zinga mi a ni. Kum 36 mi Federer hi 1977 hnu lamah chuan he hmuna quarterfinal lut thei upa ber a ni bawk.

A vawi 20 nana Grand Slam champion nih tum Federer hian quarterfinal-ah chuan Tomas Berdych a hmachhawn leh dawn, seeded 19-na Berdych nen hian Nilainiah an intawng dawn a, season hmasa third round rematch kan hmu dawn a ni - nikum khan Federer-a'n hnehna changin a champion zui bawk.

Kum 36 mi Federer chuan, "Season hmasa a chak loh tawhna phuba lak ngei a duh ang, a inkhel lai ka en tawh a, a ball vuak a dikin a khel ṭha hle a ni," tiin quarterfinal-a a hmachhawn tur Berdych chungchang a sawi.

Czech Republic tlangval Berdych hian a thiam pariat zinga tel turin Fabio Fognini chu 6-1, 6-4, 6-4 in a sawp ve bawk a, kum 32 mi Berdych hian a match hmasa zawkah Juan Martin del Potro a hneh tawh, nikuma a hneh loh Federer hmaah inrintawkna nen a inlan thei ang.

Inkhel dang
Pathiannia last 16 inkhelah Kyle Edmund chuan Andreas Seppi hnehin a vawi khat nan Grand Slam quarterfinal a lut. Melbourne Park-ah Britain tlangval hian 6-7 (4-7), 7-5, 6-2, 6-3 in hnehna a chang a, semifinal thleng tur chuan Grigor Dimitrov a paltlang leh a ngai dawn.

Kum 23 mi Edmund hian inkhel bul ṭan fuh loin set hmasa ber a hloh. Mahse, a service ṭhat a hmang ṭangkai zui a, aces vawi 25 vaw chhuakin dai ngai loh ram a dai. Andy Murray chhiar tel loin Britain mipa player zingah John Lloyd (1985) hnu lama Australian Open quarterfinal lut thei hmasa ber a ni.

Edmund a khingpui tur Dimitrov hian khawtual player Nick Kyrgios chu inkhel inhnehtawk takah 7-6 (7-3), 7-6 (7-4), 4-6, 7-6 (7-4) in a hneh hram. Australian mipa ten kum 42 chhung zet an rama inelna lian ber nomawi an chawi lohna record duhawm lo tak chu an thaichhe thei rih dawn lo.

Kum 22 mi Kyrgios chu khawtual player a nih avangin Melbourne Park-ah ṭan a hlawh a, a khel chhe hran lo. Aces vawi 36 siamin winners vawi 76 a vaw chhuak bawk, heng pahnihah hian Dimitrov (16 aces leh winners 64) aiin a chungnung zawk.

Amaherawhchu, Kyrgios hi a fimkhur tawk loh vangin unforced errors vawi 56 ngawt a nei a, a tihsualah a khingpuiin point a hmuh hnem avangin a zinkawng a tawp.

Grand Slam pali zinga hmasa ber leh, Aisa aṭanga awmchhun ni bawk Australian Open hi zing dar 9:00 aṭanga khelh ṭan tur a ni a, mipa singles an khel hmasa ang - Mizoram aṭang chian Sony Six-ah live a en theih a ni.