Striker lei thar a ngai lo - Hazard

Chelsea midfielder Eden Hazard chuan tun thlasik bazar hun chhungin striker thar lei an ngaih loh thu a sawi. Blues hi Edin Dzeko, Andy Carroll leh Peter Crouch te nen sawi zawm mek an ni.

Premier League champion Blues tan striker rinrawl Alvaro Morata a khel ṭha tawk lo a, Spain international tha chhang dawltu Michy Batshuayi -a'n beisei a phak lo bawk.

Antonio Conte-a'n tun hma aṭangin tlar hmaah player lian pakhat hman a uar ṭhin a, tuna a neih lai bakah tun hnaia an hel laite pawh Italian manager duhdan a khel thei tura ngaih an ni.

Amaherawhchu, Belgium international Hazard leh Blues manager ngaihdan a inang lo niin a lang. League-a goal riat khung tawhtu Hazard chuan, "Striker ṭha tak Alvaro leh Michy te kan nei a, an remchang lo a nih pawhin tlarhmaah ka khel thei," a ti.

Ball kang vawrh a ngainat loh thu sawi zuiin Hazard chuan, "Leiah ball dah ila, Brighton laka kan tih ang khan nuam takin a inpek kual theih. Goal kan khung lohin striker mamawh vaiau angin min sawi a, goal kan khung niah erawh team ṭha ber kan ni," tiin a sawi.

London club hian Premier League season kal laiah goal 45 an khung tawh a, an hnuaia awm Arsenal nen an khung zat a inang. Mahse, a sang team panga zingah chuan goal khung tlem ber an ni.