Halep leh Kerber an tlang

Australian Open hmeichhe singles champion tura rinkai Simona Halep leh Angelique Kerber te chuan quarterfinal an lut. Kerber hian Nilainiah Madison Keys a hmachhawn leh dawn a, Halep hmachhawn tur a la chiang lo.

Nimin khan Margaret Court Arena-ah Halep a inlar, Romanian star hian darkar khat leh minute 19 chhungin Naomi Osaka chu 6-3, 6-2 in a hneh. Seeded pakhatna Halep hian Australian Open quarterfinal vawi thum a luhna chiah a ni a, kum 2015 hnulamah erawh a vawi khatna a ni thung.

Kum 26 mi Halep hian French Open final vawi hnih a khel tawh a, mahse Grand Slam nomawi a la chawi lo. Nikum October thla aṭang khan world number 1 nihna chelhin, a vawi khat nan major tournament-ah champion a tum mek a ni–Karolina Pliskova leh Barbora Strycova te inkhela chak zawk a hmachhawn leh dawn a ni.

Halep chuan, "Hliam damkawr chungin inelna bul ka ṭan a, ka tan chuan quarterfinal luh hi a sang tawh hle. Ka tan cuan tun tournament hi marathon ang mai a ni, a awlsam lo. Tunah chuan hliam ka ngaihtuah lo a, ka khelh hmabak chiah ka rilruah a awm tawh," tiin a sawi.

Mahni inven thiam Halep hian ṭum dang ang bawkin defensive game ṭha tak a khel leh, awlsam taka set hmasa zawk a lak hnuah set hnuhnung zawkah pawh unforced errors vawi nga chiah neiin, break point vawi thum a hmuh a chhawr ṭangkai zui thei vek bawk a ni.

Last 16 inkhel dangah Kerber-i'n fiahna hautak a hmachhawn, German nula hian world number 88 Hsieh Su-wei lakah set hmasa ber a hloh zet hnuah 4-6, 7-5, 6-2 in hnehna a chang.

Tennis season thara Grand Slam hmasa berah hian hmeichhe player langsra an tla hma hlawm viau. Tuna player dam lai zingah Kerber chiah hi major title la tawh a ni a, 2016-a a champion tawhna hmunah Kerber hi rinkai berte zinga mi a ni mek.

Hsieh Su-wei hian a match hmasa lamah Wimbledon champion Garbine Muguruza leh seeded 26-na Agnieszka Radwanska a hneh thei a, Kerber lakah pawh a ball vuak na tak hmangin inkheltir lam a thunnun hle–set hnihna an khelh lai pawhin 5-4 in hma a hruai hman a, hun pawimawhah Kerber a vannei zawk hlauh a ni.

World number 1 hlui Kerber chuan, "Court chhung hmun hran hranah khan ball vaw phei mah ila a lo awm hman zel a, a tlan tamin a ball vuak a na hle bawk. Tun season chhungin result ṭha a neih chhoh ngei ka ring," tiin a hneh tak Hsieh Su-wei a dahsang hle.