East Bengal-in Plaza chhuah dawn

Kolkata club East Bengal chuan derby-a Mohun Bagan an ngam loh hnu lawkah Willis Plaza chhuahtir turin hmalakna an kalpui nghal a, Trinidad and Tobago international hmunruak luah tur chungchangah erawh thutlukna chiang tak a la awm thei lo.

Trinidad and Tobago international hian EB-ah beisei a phak lo takzet a, Calcutta Football League-ah takngial pawh goal khung a harsat avangin season ṭan hman khan Kolkata club hian chhuahtir an duh tawh. Mahse, coach Khalid Jamil-a'n a striker hi a rin luih avangin an chelh a, beisei a phak loh zel avangin tunah erawh an chhuah dawn ta niin a lang–Plaza hian league match 10-ah goal hnih chiah a la khung a, a goal khungna hi Churchill Brothers an ni.

Plaza hian season hman zawh takah khan East Bengal tan league match 12 inkhel bul a

ṭanah goal kua a khung a, mah se a goal khungte hi season hmasaa team tenau Mumbai FC, Chennai City FC leh Minerva Punjab te an ni.

Kum 30 mi striker hi East Bengal-in chhuah dawn mah se I League defender-ten hmachhawn harsa an tih ber erawh a ni lawi a, Shillong Lajong South Korean defender Oh Juho chuan Aizawl-a press conference-ah hmachhawn harsa a tih ber a nih thu a lo sawi tawh a, Aizawl FC defender Masih Saighani leh Kareem Omolaja te chuan I League striker ven hahthlak ber a nih thu Vanglaini an lo hrilh tawh bawk.