National umpire thar pahnih

Hockey Mizoram chuan rahbi thar an kai leh ta. K. Lalremruati leh KT Lalhlimpuii te chu national umpire atan an tling. Lalrampari bakah Mizo zingah national umpire ni thei pathum an awmna chiah a ni. Anni pahnih hi January 10-21 chhunga khelh zawh tak Sub Junior Hockey Tournament-ah khan umpire an ni a, Ruati hian final a enkawl.

Saitual nula Lalremruati hi India international player hlui a ni a, February thlaa khelh tur Senior National Championship-ah pawh umpire a ni chhunzawm dawn, SAI Hockey Academy (Thenzawl) a thawk lai Lalhlimpuii hi National Junior Championship-ah umpire atan a inlan zui dawn bawk a ni.

Ruati chuan, "Tun dinhmun kan thlen theih nana min hruaitu Pathian leh Hockey Mizoram chungah ka lawm a, national mai ni loin international umpire thleng nih tumin kan bei ang," tiin Vanglaini a hrilh.

National umpire ni tur hian Hockey India chuan Mizoramah clinic an nei a, chumi aṭang chuan a ti ṭha an ko. Dan leh hrai bakah fitness test an paltlang hnuah national inelna thunun thei turin an tling chho a ni.